Flavıo Bolsonarý Brazılııa prezıdenttigine kandıdat retinde usynyldy
ASTANA. KAZINFORM — Senator Flavıo Bolsonarý Brazılııa prezıdenttigine Lıberaldyq partııadan resmı túrde kandıdat retinde usynyldy, dep habarlaıdy AP.
Aldaǵy prezıdent saılaýynda ol qazirgi memleket basshysy Lýıs Inasıý Lýla da Sılvamen básekege túspek.
Lıberaldyq partııa burynǵy prezıdent Jaır Bolsonarýdyń úlken uly Flavıo Bolsonarýdyń kandıdatýrasyn maquldady. Alaıda resmı túrde usynylǵanyna qaramastan, onyń saılaýaldy naýqany birqatar qıyndyqtarǵa tap bolyp otyr.
Saıasatker ázirge vıtse-prezıdenttikke kimniń kandıdat bolatynyn anyqtaǵan joq. Sonymen qatar ol iri tsentrıstik partııalardyń qoldaýyna da ıe bola almady. Bul partııalar onyń ákesiniń ótken saılaýdaǵy jeńisinde mańyzdy ról atqarǵan edi.
Kandıdatty usyný rásimi San-Paýlý qalasynda ótip, oǵan shamamen 500 jaqtaýshy qatysty. Alaıda sharaǵa Brazılııanyń saıası elıtasynyń yqpaldy ókilderi kelgen joq.
Sharaǵa burynǵy prezıdenttiń jubaıy, evangelıstik saılaýshylar arasynda bedeldi Mıshel Bolsonarý da qatyspady.
Sonymen birge senator halyqaralyq qoldaýǵa úmit artyp otyr. Onyń odaqtastarynyń qatarynda Argentına prezıdenti Haver Mıleı de atalady.
Buǵan deıin Flavıo Bolsonarý saılaýaldy naýqanynyń halyqaralyq baǵytyn kúsheıtken edi. Brazılııalyq senator Vashıngtonda AQSh prezıdenti Donald Tramppen, vıtse-prezıdent Djeı Dı Venspen jáne Memlekettik hatshy Marko Rýbıomen kezdesti.
Aıta keteıik, byltyr Brazılııanyń eks-prezıdenti Jaır Bolsonarý memlekettik tóńkeriske qatysty ustalǵan bolatyn.
Jeltoqsan aıynda Bolsonarýdy bas bostandyǵynan aıyrý merzimi 27 jyldan eki jylǵa deıin qysqarýy múmkin ekenin jazdyq.
