Fızıkadan tarıhı trıýmf: Qazaqstan álemdegi eń bedeldi olımpıadada bes altyn ıelendi
ASTANA. KAZINFORM – Qazaqstan quramasy fızıkadan eń bedeldi halyqaralyq bilim dodasynda el tarıhyndaǵy eń úzdik nátıjege qol jetkizdi.
4-12 shilde aralyǵynda Kolýmbııanyń Býkaramanga qalasynda ótken 56-shy Halyqaralyq fızıka olımpıadasynda (International Physics Olympiad, IPhO) ulttyq quramanyń bes múshesi de altyn medal jeńip aldy.
Oqý-aǵartý mınıstrligi málimetinshe, bıylǵy olımpıadaǵa álemniń 85 elinen 381 oqýshy qatysty. Qatysýshylar kúrdeli teorııalyq jáne eksperımenttik tapsyrmalardy oryndap, bilimi men ǵylymı daıarlyǵyn synǵa saldy. Qazaqstandyq jas fızıkter joǵary daıyndyq deńgeıin kórsetip, bes altyn medal ıelendi. Bul – Qazaqstannyń IPhO olımpıadasyna qatysý tarıhyndaǵy eń úzdik nátıje.
Altyn medal ıegerleri:
Egenbergenova Nurgúl – Astana qalasyndaǵy NURORDA mektep-lıtseıiniń 11-synyp oqýshysy;
Azatbekov Amırbek – Astana qalasyndaǵy jaratylystaný-matematıka baǵytyndaǵy NIS-tiń 12-synyp oqýshysy;
Qazymbek Ilııas – Astana qalasyndaǵy Spectrum International School mektebiniń 12-synyp oqýshysy;
Cheremnov Roman – Almaty qalasyndaǵy «Mıras» halyqaralyq mektebiniń 12-synyp oqýshysy;
Qurman Damır – Astana qalasyndaǵy jaratylystaný-matematıka baǵytyndaǵy NIS-tiń 11-synyp oqýshysy.
Bul tarıhı jetistikke ulttyq qurama úsh jyl boıy júıeli daıyndaldy. Komandany mektep muǵalimderi, tálimgerleri jáne ulttyq quramanyń jattyqtyrýshylary daıyndady. Daıyndyq jumystaryna ál-Farabı atyndaǵy Qazaq ulttyq ýnıversıtetiniń aǵa oqytýshysy, PhD doktory Gúlııa Nurbaqova jetekshilik etti. Al Halyqaralyq fızıka olımpıadasynda ulttyq quramanyń jumysyn SDU ýnıversıtetiniń aǵa oqytýshysy, PhD doktory Samat Maqsutov pen fızıkadan halyqaralyq olımpıadalardyń júldegeri Alısher Erkebaev úılestirdi.
Aıta keteıik, Halyqaralyq fızıka olımpıadasy 1967 jyldan beri ótkizilip keledi. Qazaqstan bul bilim dodasyna 1997 jyldan beri turaqty qatysyp keledi. 2025 jyly ulttyq qurama eki kúmis jáne úsh qola medal jeńip alǵan bolsa, bıyl elimizdiń bes oqýshysy da altyn medal ıelenip, Qazaqstan tarıhyndaǵy buryn-sońdy bolmaǵan nátıjege qol jetkizdi.
– Qazaqstannyń jas fızıkterin, olardyń ustazdaryn, ata-analaryn jáne barsha qazaqstandyqtardy osy tarıhı jeńispen quttyqtaımyz! Bul jetistik – daryndy jastardyń qajyrly eńbegi men ustazdardyń kásibı biliktiliginiń, sondaı-aq elimizdegi olımpıadalyq daıarlyq júıesiniń joǵary deńgeıiniń jarqyn kórinisi, - delingen mınıstrlik habarlamasynda.
Qazaqstan oqýshylary Eýropalyq geografııa olımpıadasynda tarıhı nátıjege qol jetkizgenin jazǵan edik.
