Fızıka páninen ótetin halyqaralyq olımpıadada Qazaqstan namysyn 5 oqýshy qorǵaıdy

«Bul olımpıadaǵa 89 memleketten 410 bala qatysady. Olar eki kezeńmen ótetin bilim saıysy barysynda 800-den astam jumys jazatyn bolady. Munshama mol jumysty biz 2-3 kúnniń ishinde tekserip bitirýimiz qajet. Tájirıbemiz asa kóp bolmaǵandyqtan, kómekke 15-20 jyl olımpıadaǵa qatysyp, ysylǵan sheteldik mamandardy shaqyryp otyrmyz. Qazirgi bizdiń quramada 5 bala bar. Onyń 4-ýi - 11-shi, 1-ýi 10-shy synypta oqıdy», - dedi E.Rysmaǵambetov. Sonymen, fızıka páninen oqýshylar arasyndaǵy 45-shi Halyqaralyq olımpıadada Qazaqstan namysyn halyqaralyq Jáýtikov olımpıadasynyń altyn, fızıkadan Azııa olımpıadasynyń kúmis, fızıkadan halyqaralyq olımpıadanyń jáne respýblıkalyq olımpıadanyń altyn medal ıegeri Ámir Bralın, halyqaralyq Jáýtikov olımpıadasynyń kúmis, respýblıkalyq olımpıadanyń altyn medal ıegeri Danat Isa qorǵamaq. Sondaı-aq Respýblıkalyq olımpıadanyń altyn, fızıkadan halyqaralyq olımpıadanyń qola medal ıegeri Dinmuhammed Nurbek, «Týımaada» halyqaralyq olımpıadasynyń qola, halyqaralyq Jáýtikov olımpıadasynyń kúmis, respýblıkalyq olımpıadanyń altyn medal ıegeri Nurıslam Tursynbek, jastar arasyndaǵy halyqaralyq jaratylystaný ǵylymdary olımpıadasynyń jáne halyqaralyq Jáýtikov olımpıadasynyń kúmis, respýblıkalyq olımpıadanyń altyn medal ıegeri Dáýlet Qurmantaev ta osy aıtýly bilim dodasynda baqtaryn synaıdy.