Fızıka, geografııa, hımııa, til: 2026 jyldan bastap qaı pánderge jasandy ıntellekt quraldary engiziledi
ASTANA. KAZINFORM – Y.Altynsarın atyndaǵy Ulttyq bilim berý akademııasynyń vıtse-prezıdenti Rýslan Qaratabanov 2026 jyly qoldanysqa enetin jańartylǵan bilim standarty muǵalimderdiń jumysyn qalaı ózgertetinin aıtty.
- Búgin Qazaqstanda bilim berýdiń jańa standarty bekitilgen. Ol 2026 jyly aınalymǵa enedi. Osy standartta jasandy ıntellekt sııaqty ýaqyt talaptary eskerilgen. Bul talaptar álemde damýdyń negizgi faktorynyń biri bolyp otyrǵandyqtan olardy eskermeý múmkin emes. Onyń ústine jasandy ıntellekt birqatar mamandyqty eńbek naryǵynan yǵystyryp tastaıdy degen qaýip te bar, - dedi ol Oqý-aǵartý mınıstrliginiń alqa májilisiniń aldynda.
Onyń sózinshe, keıbir mamandyqtan «ardager-mamandyqtarǵa» aınalýy múmkin.
- Jańa mamandyqtar paıda bolyp jatyr. Qalaı desek te jasandy ıntellekt balalar meńgerip shyǵýǵa tıis quraldyń biri bolyp otyr. Sondyqtan kez kelgen pán jasandy ıntellekt bazasyndaǵy quraldardy qoldana otyryp oqytylady. Mysaly, bıologııa, hımııa, fızıka pánderinde vırtýaldy zerthanalar qoldanylady. Al til pánderinde áńgimelesip, dıalog qurýǵa arnalǵan qosymshalar qoldanylady. Geografııa páninde navıgatsııalyq júıeler engiziledi. Qazir halyq generatıvti jasandy ıntellekt týraly ǵana aıtyp júr. Al biz bilim berýge onymen qatar generatıvti emes jasandy ıntellektini de qoldanamyz, - dedi Rýslan Qaratabanov.
Eske salsaq agroónerkásip salasyna jasandy ıntellekt engizýge grant bólinetini týraly jazǵan bolatynbyz. Sonymen qatar Digital Almaty forýmy aıasynda Jaslan Mádıev jasandy ıntellektiniń qazaqstandyqtardyń ómirine áseri týraly pikir bildirgen edi.