Fıtosanıtarlyq baqylaýdan keıin 105 tonna qyrǵyzstandyq ónim keri qaıtaryldy
ASTANA. QazAqparat - Qyrǵyzstanmen shekaradaǵy fıtosanıtarlyq baqylaý kúsheıgen sátten beri 15 quqyqbuzýshylyq anyqtaldy, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.
Vedomstvo derekterine sáıkes, baqylaý jáne belgileý pýnktterinde 821,4 tonna, 332 tekshe metr (kesilgen aǵashtar) karantınge jatqyzylǵan ónimi bar 117 júk avtokóligi tekserýden ótkizildi jáne 15 quqyqbuzýshylyq anyqtaldy. 14 fakt boıynsha 105,1 tonna júk Qyrǵyzstanǵa keri qaıtaryldy (ondaǵy 2 fakt boıynsha aıyppul salyndy, 1 fakt boıynsha komstok qurty tabyldy), taǵy bir fakt boıynsha aıyppul salyndy. Aıyppuldardyń jalpy somasy 68 myń teńgeni qurady.
Odan bólek, 10 qazan kúni Qazaqstan men Qyrǵyzstan shekarasynda veterınarlyq baqylaý kúsheıdi. Qazirgi ýaqytta 6 shekaralyq veterınarlyq beketke 32 ınspektor jumyldyrylǵan. Sondaı-aq, shekaradan ótken qyrǵyz ónimderinen tyıym salynǵan jáne lastaǵysh zattardyń (antıbıotıkter, mıkroorganızmder, aýyr metalldar tuzy jáne t.b.) tabylýyna baılanysty, belgileý beketterinde baqylaý men qadaǵalaýdy kúsheıtý týraly nusqaý berildi.
Qazirgi ýaqytta Qazaqstanǵa óz ónimin jetkizý quqyǵy bar kásiporyndar tiziminde Qyrǵyzstannyń 15 sút óńdeýshi, 8 balyq óńdeýshi jáne 2 daıyn et ónimderin óndirýshi - jalpy sany 25 kásiporny bar.
Ázirge 5 qyrǵyzstandyq sút óńdeý kásipornyn tekserýde jáne jetkizilgen ónimge baqylaý jasaýda quqyqbuzýshylyqtar anyqtalyp, olarǵa óz ónimderin Qazaqstanǵa jetkizýge tyıym salyndy.
Jekelegen azyq-túlik ónimderine qatysty taǵy 2 qyrǵyz kásipornyna kúsheıtilgen zerthanalyq baqylaý engizildi (ónimniń ár toptamasynan alynǵan synamalar zerthanalyq zertteýge jiberiledi).
13 qazan kúni «Qarasý» beketinde «Rıha» JShS (Shý oblysy) shujyq ónimderi tıelgen mashına toqtatyldy jáne veterınarlyq sertıfıkaty durys toltyrylmaǵan (12.10.2017 № KG 0883-00000047 veterınarlyq sertıfıkatynda taýarlyq-kóliktik júkqujattardyń barlyǵy kórsetilmegen). Júk keri qaıtarylyp, 226 900 teńge kóleminde aıyppul salyndy.
Qyrǵyz taýarlaryna qatysty veterınarlyq baqylaýdy kúsheıtken sátten bastap, olardy ákelý men tranzıt kórsetkishiniń kúrt tómendegeni baıqalady.
