Fıtosanıtarııalyq sertıfıkatty alýǵa qajetti qujattar tizbesi qysqardy
«2020 jyly sybaılas jemqorlyq táýekelderin joıý maqsatynda ósimdikter karantıni jónindegi ınspektorlar baqylaý jáne qadaǵalaý is-sharalaryn júzege asyrý kezinde olardyń is-áreketterin tirkeıtin foto jáne beıne quraldarymen jaraqtandyryldy. Eksportqa yqpal etý maqsatynda fıtosanıtarııalyq sertıfıkatty alý úshin qajetti qujattar tizbesi qysqardy. Budan basqa, karantındik sertıfıkaty berý merzimi 3 kúnnen 1 kúnge, fıtosarıtarııalyq sertıfıkaty berý merzimi 5 kúnnen 3 kúnge qysqardy», - dedi mınıstr Úkimet otyrysynda.
Onyń aıtýynsha, tez buzylatyn ónimge 3 jumys saǵaty ishinde karantındik jáne fıtosanıtarııalyq sertıfıkatty alýdyń ońaılatylǵan tártibi qarastyryldy.
«Respýblıka aýmaǵyndaǵy turaqty karantındik fıtosanıtarııalyq ahýaldyń arqasynda otandyq ósimdik sharýashylyǵy ónimin ótkizýdiń basym naryǵyna jetkizýge shekteýler joq. Qytaıdyń Bas keden basqarmasymen fıtosanıtarııalyq karantındik talaptar boıynsha 10 hattamaǵa qol qoıyldy. Qytaı Halyq Respýblıkasy Tizilimine ósimdik sharýashylyǵy ónimderin óndiretin jáne óńdeıtin 486 otandyq kásiporyn engizildi. Ósimdik sharýashylyǵy men mal sharýashylyǵy ónimderin qadaǵalaý júıesin jáne Rosselhoznadzordyń aqparattyq júıesimen ıntegratsııany damytý jumysy júrgizilýde», - dedi S. Omarov.
Budan buryn habarlanǵandaı, 2020 jyldyń 9 aıy ishinde Qazaqstan Respýblıkasyna karantınge jatqyzylǵan ónimniń ımporty kezinde ósimdikter karantıni salasynda 3 082 ereje buzýshylyq anyqtaldy.
Sonymen qatar, Úkimet otyrysynda Premer-Mınıstr veterınarııa mamandyǵyna bilim granttaryn kóbeıtýdi tapsyrdy.