«Fıtohımııa» ǵylymı-óndiristik ortalyǵynyń qurylǵanyna 30 jyl toldy
QARAǴANDY. KAZINFORM — otandyq ǵylym men farmatsevtıka salasynyń kóshbasshysy — «Fıtohımııa» ǵylymı-óndiristik ortalyǵynyń qurylǵanyna 30 jyl boldy. Kásiporyn ujymyn mereıtoıymen QR Ǵylym jáne joǵary bilim mınıstri Saıasat Nurbek quttyqtady. Bul týraly QR Ǵylym jáne bilim mınıstriligi málim etti.
1990 jyldarda tabıǵı qosylystar hımııasy zerthanasy bolǵan kásiporyn osy jyldar ishinde eldiń strategııalyq obektisine aınaldy.
— «Fıtohımııa» ortalyǵynyń jarqyn jetistikteri qatarynda álemniń 11 elinde patentpen qorǵalǵan «Arglabın», «Salsokollın», «Saýsalın», «Ekdıfıt», «Ekdısop», «Aıafrol» jáne basqa da biregeı dárilik preparattar jatady. Ortalyqtyń iri ári tabysty jobasy 70-ten astam otandyq dárilik preparattardy shyǵaratyn Qaraǵandy farmatsevtıkalyq zaýytyn salý jáne paıdalanýǵa berý boldy, — dep habarlady vedomstvodan.
Ortalyqtyń qalyptasý jyldarynda álemde tanylǵan ǵylymı mektep quryldy, onyń qyzmetkerleri 17 doktorlyq jáne 60-tan astam kandıdattyq dıssertatsııany sátti qorǵady, 20 PhD doktory jáne 30-dan astam magıstrler daıyndaldy.
— Álemniń 17 eliniń 150-den astam belgili sheteldik ǵalymdaryn biriktiretin Dárilik zattar hımııasy jónindegi halyqaralyq ortalyqtyń «Fıtohımııa» ǵylymı-óndiristik ortalyǵynda ornalasýy kásiporynnyń tabıǵı qosylystar fıtohımııasy men farmakologııasy salasyndaǵy jetistik, — delingen habarlamada.
«Fıtohımııa» ǵylymı-óndiristik ortalyǵy otandyq farmatsevtıkalyq óndiriske ınvestıtsııalar tartyp, ǵylymı-zertteý jumystarynyń nátıjelerin kommertsııalandyrýǵa úlken úles qosyp keledi, jańa dárilik preparattar óndirisin uıymdastyrý jáne olardy klınıkada qoldaný boıynsha bıznes-seriktestermen lıtsenzııalyq kelisimder jasap jatyr.
«Fıtohımııa» ǴÓO» AQ men Pannon Pharma LTD (Vengrııa) kompanııasy arasynda ósimdik zattary negizinde biregeı dárilik preparattardyń birlesken óndirisin uıymdastyrý boıynsha ózara túsinistik jáne Qazaqstan Respýblıkasyna ınvestıtsııalar salý týraly Memorandým jasaldy, bul biregeı qazaqstandyq preparattardy Eýropaǵa shyǵarýǵa múmkindik beredi. «Shanghai Zenith Biotech Co.Ltd» kompanııasymen (QHR, Shanhaı q.) qazaqstandyq ósimdik shıkizatynan alynǵan bıologııalyq belsendi qosylystar negizinde sýbstantsııa óndirý jónindegi birlesken kásiporyndy uıymdastyrý týraly kelisim jasaldy.
«Fıtohımııa» ortalyǵy Qaraǵandy farmatsevtıkalyq kesheniniń 2-kezegin salý úshin Ulttyq ınnovatsııalyq qordan, al QFK-nyń 3-kezegi úshin reseılik «Farmstandart» farmatsevtıkalyq kompanııasynan ınvestıtsııa tartty.
Qazirgi ýaqytta «Fıtohımııa» ortalyǵy — farmatsevtıka salasynda ınnovatsııalyq jobalardy iske asyrýdyń negizgi kásiporny.
Buǵan deıin habarlanǵandaı, 2024 jyly otandyq farmatsevtıkalyq ónimderdi óndirý kólemi 18 paıyzǵa artty.