Fıtnes-klýbtar men meıramhanalardyń tabysy tekseriledi – Kirister komıteti

ASTANA. KAZINFORM – Búginde memlekettik bıýdjetke 27 mlrd teńgeden astam qarajat tólendi. Bul týraly Memlekettik kirister komıteti habarlaıdy.

Qarjy mınıstrligine qarasty Memlekettik kirister komıteti qazaqstandyqtardyń salyq mindetin oryndaý barysyn qadaǵalap, anyqtaýdy jalǵastyryp jatyr.

Komıtettiń málimetine súıensek, qazir bıýdjetke qurylys kompanııalarynan 16,5 mlrd teńge, saýda uıymdarynan 2,8 mlrd teńge, qyzmet kórsetý salasy boıynsha  2,1 mlrd teńge, sondaı-aq basqa salalardan 5,6 mlrd teńge salyq tústi. Atalǵan baǵyttaǵy jumys jalǵasady.

- Naqty shyǵyndar men kiristerdi salystyrý maqsatynda iri premıým sanatyndaǵy fıtnes-klýbtar men meıramhanalardy tekserýge kiristi, - delingen habarlamada.

Aıta ketsek, elimizde salyq bereshegin óndirip alý tártibi qaıta qaralady.

Sondaı-aq Memleket basshysy salyq reformasy aıasynda batyl sharalardy dál qazir qabyldaý kerektigin aıtqan edi. 

Eske sala ketsek, aqpannyń sońynda Úkimet basshysy Oljas Bektenov kásipkerlerdi eki aptada salyq somasyn ádiletti túrde tóleýge shaqyrdy. Ol tizimde BI Group, BAZIS jáne basqa da kóptegen iri qurylys kompanııasy júr. 

Úkimet basshysynyń tapsyrmasynan keıin BI Group, BAZIS taǵy basqa kompanııalar 17 mlrd teńge salyq tóledi.