Fitch Ratings agenttigi Otbasy bankiniń reıtıngin BBB deńgeıinde rastady, boljam – «Turaqty»
ASTANA. KAZINFORM — Halyqaralyq Fitch Ratings reıtıngtik agenttigi Otbasy bank («Báıterek» holdınginiń enshiles uıymy) ulttyq valıýtadaǵy emıtenttiń uzaq merzimdi defolt reıtıngin «BBB» deńgeıinde rastady. Reıtıng boıynsha boljam – «Turaqty».
Reıtıngtiń rastalýy banktiń qarjylyq jaǵdaıynyń ornyqtylyǵyn, aktıvter sapasynyń joǵarylyǵyn, turaqty qorlandyrý bazasyn jáne Qazaqstandaǵy turǵyn úı qarjylandyrý júıesin damytýdaǵy júıequraýshy rólin kórsetedi.
— Qazirgi tańda Otbasy bankinde 4 mıllıonnan astam depozıt ashylǵan. Olardyń árqaısysynyń artynda óz baspanasyna qol jetkizýdi maqsat etken qazaqstandyq otbasylardyń senimi tur. Biz úshin Fitch reıtıngi — banktiń qarjylyq turaqtylyǵynyń, bıznes-modelimizdiń tıimdiliginiń jáne salymshylar tarapynan kórsetilgen joǵary senimniń táýelsiz halyqaralyq rastaýy. Ulttyq damý ınstıtýty retinde biz tek qarjylyq mindetterdi ǵana emes, sonymen qatar turǵyn úıdi ashyq ári ádil bólýdi qamtamasyz etetin mańyzdy memlekettik mıssııany da atqaryp kelemiz. Protsesterdi tsıfrlandyrýdyń arqasynda sońǵy bir jylda turǵyn úıdi bólý kólemi úsh esege artty, al turǵyn úıge muqtaj retinde esepte turǵan 21 906 azamat qonys toıyn atap ótti, — dedi Otbasy bankiniń basqarma tóraıymy Lázzat Ibragımova.
2026 jyldyń birinshi jartyjyldyǵynda Otbasy bankinde 485 252 qazaqstandyq jańa depozıt ashty. Bul ótken jyldyń sáıkes kezeńimen salystyrǵanda 21,9%-ǵa kóp.
Jańa salymshylar sanynyń ósýi bolashaqta Otbasy bankinde jınaqtalǵan qarajattyń qazaqstandyqtarǵa jyldyq 3,5%-dan bastap (JTSM 3,6%-dan 4,4%-ǵa deıin) qoljetimdi mólsherlememen ıpoteka alýǵa múmkindik berýimen baılanysty.
Banktiń halyqtyń uzaq merzimdi salymdaryndaǵy úlesi 39% quraıdy. Klıentterdiń jınaq shottarynda 3,3 trln teńge jınalǵan.
Otbasy bankiniń kómegimen kún saıyn 320 qazaqstandyq turǵyn úı zaemyn alyp, qonys toıyn toılaýda. Eldegi ıpotekalyq portfeldegi banktiń úlesi 55% quraıdy. Jyl basynan beri 43687 qoljetimdi zaem berildi.
Bank sondaı-aq ekinshi deńgeıli bankter arasynda kredıttik portfel sapasy boıynsha úzdik kórsetkishterdiń birin kórsetip otyr. 90 kúnnen astam merzimi ótken bereshegi bar kredıtterdiń úlesi (NPL 90+) — 0,14%, al bank sektoryndaǵy ortasha kórsetkish 4,19% deńgeıinde.
Otbasy bank aktıvteri boıynsha 4-orynǵa kóterildi. Sonymen qatar, menshikti kapıtaly boıynsha qazaqstandyq ekinshi deńgeıli bankter arasynda 6-orynda tur.
Búginde Otbasy bankiniń qoldaýy men turǵyn úı qurylys jınaqtary júıesiniń senimdiliginiń arqasynda 679 644 qazaqstandyq otbasy óz baspanasynda turyp jatyr.
