Fitch Ratings Qazaqstannyń ekonomıkalyq ósimine boljam jasady

ASTANA. QazAqparat - 2018 jylǵy 28 qyrkúıekte Fitch halyqaralyq reıtıng agenttigi Qazaqstannyń táýelsiz nesıe reıtıngin «BBB» deńgeıindegi «Turaqty» boljamynda bekitti. Bul jaıynda QR Ulttyq ekonomıka mınıstrliginiń baspasóz qyzmetinen málim etti,  dep habarlaıdy QazAqparat tilshisi.

«Qazaqstannyń reıtıngin kóteretin negizgi faktorlar qomaqty memlekettik jınaqtarmen jáne memlekettiń aıtarlyqtaı taza sheteldik aktıvterimen nyǵaıtylatyn kúshti memlekettik jáne syrtqy balanstar bolyp tabylady. Júrgizilgen bank salasyn qaıta qurý jáne qazynalyq shoǵyrlandyrý qomaqty qorlardyń saqtalýyn qamtamasyz etedi. Monetarlyq saıasat ınflıatsııa men ınflıatsııalyq boljamdardy azaıtý jónindegi úderisterdi nyǵaıtady», - dep atap ótedi vedomstvodan.

Mınıstrlik aqparatyna sáıkes, Fitch taldaýshylary Ulttyq bank retteý júıesin, monıtorıngileý tetigin jaqsartyp, bank salasyn tazalaýdy jalǵastyrýda dep atap ótken. Máselen, Ulttyq bank kapıtaldandyrý jónindegi talaptarǵa sáıkes kelmeıtin bankterdiń lıtsenzııalaryn qaıtaryp alýda.

Sondaı-aq, sarapshylardyń pikirinshe, aıyrbas baǵamynyń aıqyn ıkemdiligi jáne monetarlyq saıasatqa senimdilik deńgeıiniń artýy jahandyq qaterlerdiń ulǵaıýynan týyndaıtyn syrtqy qubylmalylyqty jumsartady.

Fitch sarapshylarynyń boljamyna qaraǵanda, 2018 jyly ekonomıkalyq ósim munaı gaz jáne taý-ken rýdasy salalarynda jalǵasýdaǵy jaǵymdy dınamıkanyń jáne naqty jalaqy men nesıeleýdiń artýynyń esebinen ishki tutynýdyń ulǵaıýynyń arqasynda 3,8 paıyz deńgeıinde bolady.