Fitch Ratings agenttigi MyCar Finance kompanııasyna halyqaralyq «B» kredıttik reıtıngin berdi
ASTANA. KAZINFORM – Halyqaralyq Fitch Ratings reıtıng agenttigi MyCar Finance mıkroqarjy uıymyna uzaq merzimdi halyqaralyq kredıttik «B» reıtıngin, sondaı-aq «BB(kaz)» deńgeıindegi ulttyq uzaq merzimdi reıtıngin berdi. Eki reıtıng boıynsha da boljam – «Turaqty».
Fitch Ratings agenttiginiń baspasóz habarlamasynda: «MyCar Finance emıtentiniń uzaq merzimdi kredıttik reıtıngi kompanııanyń «B» deńgeıinde baǵalanǵan derbes kredıttik qabilettiligine negizdelgen. Reıtıng kompanııanyń jetkilikti tabysyn, qaryz júktemesiniń qalypty deńgeıin jáne aktıvter sapasynyń jaqsaryp kele jatqanyn kórsetedi», – dep atap ótilgen.
Fitch Ratings sarapshylarynyń baǵalaýynsha, MyCar Finance kompanııasynyń turaqtylyǵyna naryqta qalyptasqan berik pozıtsııasy, Qazaqstandaǵy eń iri avtodıstrıbıýtor ári avtokólik óndirýshisi - Astana Motors kompanııalar tobynyń quramynda bolý, sondaı-aq jeńil avtokólikter túrindegi ótimdi kepilmen qamtamasyz etilgen nesıe portfeli oń áser etedi.
Agenttik reıtıngke yqpal etken negizgi faktorlardyń qatarynda kompanııa aktıvteri sapasynyń jaqsarǵanyn, sonyń ishinde qunsyzdanǵan qaryzdar úlesiniń jáne jańadan berilgen kredıtter boıynsha defolt deńgeıiniń tómendegenin atap ótti.
«Fitch Ratings bizdiń kompanııaǵa kredıttik reıtıng bergen ekinshi halyqaralyq reıtıng agenttigi boldy. Fitch Ratings reıtıngin alý – kompanııamyzdyń damýyndaǵy mańyzdy kezeń ári sapaly kórsetkish. Bul bizdiń bıznes-modelimizdiń turaqtylyǵyn rastap, kompanııamyz ben klıentterimiz úshin jańa múmkindikterge jol ashady», – dedi MyCar Finance dırektory Vıacheslav Pavlenko.
Reıtıngtiń berilýi MyCar Finance kompanııasynyń naryqtaǵy pozıtsııasyn nyǵaıtý jáne ınvestorlarmen uzaq merzimdi áriptestikti damytý strategııasyna tolyq sáıkes keledi. Eki táýelsiz halyqaralyq uıymnan oń baǵanyń berilýi kompanııa qyzmetiniń ashyqtyǵyn arttyryp, ınvestorlar men seriktesterdiń senimin kúsheıtedi. Atap aıtqanda, halyqaralyq reıtıngke ıe bolý oblıgatsııalar naryǵyna shyǵýdy jeńildetip, áleýetti ınvestorlar sheńberin keńeıtedi.
Qazaqstan Respýblıkasy Ulttyq bankiniń málimetine sáıkes, MyCar Finance aktıvter kólemi men kredıttik portfeli boıynsha elimizdegi mıkroqarjy uıymdarynyń arasynda ekinshi orynda tur. 2026 jylǵy 1 tamyzdaǵy jaǵdaı boıynsha berilgen mıkrokredıtter portfeli 440 mln AQSh dollaryn quraıdy.
