Fitch Qazaqstannyń kredıttik reıtıngin «BBB» deńgeıinde rastady
ASTANA. KAZINFORM – Fitch Ratings halyqaralyq reıtıngtik agenttigi Qazaqstannyń táýelsiz kredıttik reıtıngin «BBB» deńgeıinde rastady. Reıtıng boljamy – «Turaqty».
Agenttik baǵalaýynsha, reıtıngtiń saqtalýyna Qazaqstannyń myqty syrtqy qarjylyq ustanymy, taza sheteldik aktıvterdiń edáýir kólemi jáne memlekettik boryshtyń tómen deńgeıi negiz bolǵan.
«Qazaqstannyń taza sheteldik aktıvter boıynsha pozıtsııasy reıtıngi uqsas elder arasyndaǵy eń myqty kórsetkishterdiń biri bolyp qala beredi», – dep atap ótti Fitch.
Agenttik málimetinshe, Ulttyq qordyń valıýtalyq aktıvteri 2026 jylǵy mamyr aıynyń sońynda 66,4 mlrd AQSh dollaryna jetken. Sonymen qatar halyqaralyq rezervter kólemi 67,6 mlrd dollarǵa deıin ósken.
Fitch sarapshylary álemdik naryqtaǵy altyn baǵasynyń joǵary bolýy rezervterdiń artýyna eleýli yqpal etip otyrǵanyn atap ótti.
Sondaı-aq agenttik Qazaqstannyń memlekettik boryshy 2026-2027 jyldary JІÓ-niń shamamen 23%-y deńgeıinde saqtalady dep boljap otyr.
«Qazaqstan ekonomıkasy 2025 jyly 6,5%-ǵa ósti. Ósim kólik sektory kórsetkishteriniń aıtarlyqtaı artýymen qatar keń aýqymdy sıpat aldy», – delingen agenttik esebinde.
Fitch kólik, óńdeý ónerkásibi jáne qyzmet kórsetý salalary aldaǵy jyldary da ekonomıkalyq belsendiliktiń negizgi draıverleri bolyp qala beredi dep kútedi.
Aıta keteıik, Tsıfrlyq qarjy aktıvteriniń aınalymyna arnalǵan ulttyq saýda platformasy iske qosylmaq.
