FISU Almatydaǵy Ýnıversıadany tarıhtaǵy úzdik oıyndar dep tanydy
ALMATY. QazAqparat - FISU sarapshylar keńesi Almatyda ótken qysqy Ýnıversıada oıyndaryn halyqaralyq stýdenttik saıystar arasyndaǵy eń úzdik oıyndar dep tanydy, dep habarlaıdy QazAqparat tilshisi.
Stýdentter sportynyń halyqaralyq federatsııasy uıymdastyrý komıtetterine mektep oqýshylary jáne stýdentteriniń halyqaralyq saıystaryn ótkizgende Almatynyń tájirıbesin eskerýdi usyndy.
2017 jylǵy 19 tamyzda Taıbeı qalasynda halyqaralyq jazǵy Ýnıversıada oıyndary ótedi.
Aıtýly sport dodasynda qazaqstandyq 121 sportshy jeńil atletıka, júzý, boks, kúres jáne basqa da sport túrlerinen el namysyn qorǵaıtyn bolady.
Ýnıversıada alaýy janbaı turyp, stýdentter sportynyń halyqaralyq federatsııasynyń atqarýshy komıteti Grand Hyatt qonaqúıinde jıyn ótkizdi.
Jıyn barysynda sarapshylar keńesi Almatyda ótken Ýnıversıada oıyndaryn qorytyndylady. Mamandar Almatydaǵy saıystyń uıymdastyrý deńgeıi men sapasyna baǵa berdi.
170 el ókiliniń aldynda sarapshylar keńesiniń jetekshisi Mılan Avgýstın baıandama oqydy.
Onyń aıtýynsha, buǵan deıin eshqandaı Ýnıversıada oıyndary Almatydaǵydaı qyzyǵýshylyq týǵyzǵan joq. Sporttyq shara ótkiziler aldynda barlyq bıletter satylyp ketken. Ýnıversıada alaýynyń estafetasy da erekshe formatta ótti.
Sarapshylar Almaty bıligi sııaqty mektep oqýshylary men stýdentterge demalys jarııalaýǵa usynym berdi.
Óz baıandamasyn qorytyndylaı kele Mılan Avgýstın Almatydaǵy ýnıversıadany úzdik dep tanydy.
«Almatyda ótken oıyndardyń tájirıbesi óte mańyzdy. Bolashaqta ýnıversıada oıyndaryn ótkizý kezinde biz Qazaqstanmen áriptestikti nyǵaıta túsemiz»,- dedi FISU prezıdenti Oleg Matytsın.
2017 jyly Almatyda ótken 28 qysqy Ýnıversıada oıyndarynyń dırektory Naıl Nýrov Matıtsyn Olegke oıyndardyń aıaqtalǵany týraly estelik sertıfıkat tabystady.
