Fıskaldyq chek bergen: Oralda 25 mln teńgege aldap soqqan jalǵan týragent 5 jylǵa sottaldy

ORAL. KAZINFORM — Oral qalasynda týrıstik kompanııanyń atyn jamylǵan alaıaq sottaldy. Bul týraly BQO prokýratýrasy málim etti.

— Oral qalasynyń turǵyny anasyn jeke kásipker retinde tirkep, jalǵan týrıstik qyzmetin uıymdastyrǵan. Zańdy bıznestiń kórinisin jasaı otyryp, ol áleýmettik jelilerde jarnama ornalastyryp, klıenttermen resmı kelisimsharttar jasap, fıskaldyq chekter bergen jáne messendjerler arqyly baılanys júrgizgen, — delingen habarlamada.

Bul azamattardyń onyń qyzmetine degen jalǵan senimin qalyptastyrǵan.

— Alaıaqtyń qurbany 15-ten astam adam boldy, zalaldyń jalpy somasy 25 mln teńgeden asqan. Oral qalalyq sotynyń úkimimen qaskúnem eki jáne odan da kóp adamǵa qatysty asa iri mólsherde alaıaqtyq jasaǵany úshin kináli dep tanyldy, — dep jazdy prokýratýradan. 

Ol týrızm salasyndaǵy kásipkerlik qyzmetpen aınalysý quqyǵynan 7 jyl merzimge jáne 5 jylǵa bas bostandyǵynan aıyryldy.