Salyq salasynda ákimshilendirý isin jappaı tsıfrlandyrý kerek - Joldaý
ASTANA. KAZINFORM — Jańa salyq kodeksi qazirgi júıeni qaıta jańǵyrtýǵa arnalǵan. Bul týraly Qazaqstan halqyna Joldaýyn jarııalaý kezinde Memleket basshysy Qasym-Jomart Toqaev aıtty.
«Ekonomıkany qarqyndy damytý úshin tek memleket qarjysyna súıený jetkiliksiz ekeni anyq. Jeke ınvestıtsııalar tartý arqyly iskerlik belsendiliktiń artýyna qolaıly jaǵdaı jasaǵan jón. Ol úshin, eń aldymen, salyq saıasaty turaqty bolýǵa tıis. Sonda bıznes te sapaly damýǵa yntaly bolady jáne jaýapkershilikpen jumys isteıdi. Jańa salyq kodeksi qazirgi júıeni qaıta jańǵyrtýǵa arnalǵan. Bul qujat salyqtyq ákimshilendirý isiniń salyq tóleýshilerge degen senimge negizdelgen múlde jańa júıesin qalyptastyrýǵa tıis. Kodekstiń erejelerin árkim árqalaı qabyldamaýy úshin ony jeńildetip, ekonomıkalyq turǵydan belsendi azamattyń bárine birdeı túsinikti etý óte mańyzdy», - dedi Qasym-Jomart Toqaev.
Prezıdentiń aıtýynsha, salyq rejımderin kásipkerlerge jasalǵan qolaıly jaǵdaıdyń nasharlap ketpeýin eskere otyryp, ońtaılandyrǵan jón.
«Bólshek salyqtyń engizilýin mysal retinde aıtýǵa bolady. Osy normaǵa senim artqan kásipkerler qyzmetin ashyq júrgize bastady, kásipterin bólshekteýdi azaıtty. Alaıda bul rejım negizinen halyqpen tikeleı jumys isteıtin kásipkerlerge qatysty bolýǵa tıis. Tutynýshylarǵa arnalǵan qyzmetter men saýda-sattyqtyń múmkindikteri tolyq paıdalanylsa, ekonomıkany damytý, salyq túsimderin arttyrý jáne halyqty jumyspen qamtý sharalary tezirek nátıje beredi. Fıskaldy reforma tabysty bolsyn desek, salyqtyq ákimshilendirý isin jappaı tsıfrlandyrý kerek. Sybaılas jemqorlyqqa qatysty syn-qaterlerdi barynsha azaıtyp, salyq salasyndaǵy úderisterdiń ashyq bolýyn qamtamasyz etý úshin ony tezirek elektrondy formatqa kóshirgen abzal. Búkil salyq saıasatyn jıi ózgerip jatqan fıskaldy ahýalǵa beıimdeý kerek, sonyń ishinde salyq mólsherlemesin de qaıta qaraǵan jón», - dedi Memleket basshysy.
Budan buryn Memleket basshysy halyqaralyq sarapshylar qazaq bankterin resýrsqa baı elder ishindegi eń kóp paıda tabatyn bankter sanatyna qosatynyn aıtty. Sondyqtan osy saladaǵy salyq mólsheri ádil belgilenýge tıis.
