Fırýzanyń Reseıde ótetin jekpe-jegine bolashaq qarsylasy Eva Valstrem keledi
ASTANA. QazAqparat - Osy jyldyń qyrkúıeginde Sankt-Peterbýrgte ótetin F.Sharıpovanyń kezekti jekpe-jegin kórýge WBC nusqasy boıynsha álem chempıony, bolashaq qarsylasy Eva Valstrem keledi. Bul týraly sportshynyń baspasóz qyzmeti málim etti, dep habarlaıdy QazAqparat tilshisi.
«Álemdik reıtıngtiń jartylaı salmaǵyndaǵy nómiri birinshi sportshy, WBC nusqasy boıynsha álem chempıony, fınlıandııalyq Eva Valstrem 8 qyrkúıekte ótetin bolashaq qarsylasy F.Sharıpovanyń jekpe-jegin kórýge arnaıy keledi», - delingen baspasóz qyzmetiniń habarlamasynda.
Qazirgi tańda F.Sharıpova ekinshi jartylaı jeńil salmaqta IBO nusqasy boıynsha álem chempıony jáne WBC Silver chempıondyq beldiginiń ıegeri. Sondaı-aq, ústimizdegi jyldyń qazan aıynda Monakoda qazaqstandyq sportshynyń Eva Valstremmen jekpe-jegi josparlanǵan.
Eske sala keteıik, 2018 jyldyń 8 qyrkúıek kúni Sankt-Peterbýrgte Fırýza Sharıpova ıspandyq Mırıam Gýterrespen rıngke shyǵady. Aıtýly sporttyq básekeni álemniń 50-den astam eli tikeleı taratylymda kórsetedi.
