Fırýza Sháripovanyń kezekti qarsylasynyń kim ekeni belgili boldy

ALMATY. QazAqparat - Bylǵary qolǵap sheberi, WIBA, WBU, IBO Championship jáne WBC Silver boıynsha eki túrli salmaq kategorııasynda baq synasatyn Fırýza Sháripovanyń kezekti qarsylasy kim ekeni anyqtaldy, dep habarlaıdy QazAqparat tilshisi.

Qazaqstandyq boksshy qyz ıspanııalyq bylǵary qolǵap sheberi Mırıam Gýterrespen kezdesedi.

Ispanııa chempıony, Álem jáne Eýropa chempıonatynyń júldegeri M. Gýterres kásibı boks alańynda 7 ret judyryqtasqan. Jeti jekpe-jekte de jeńis tuǵyryna kóterilgen. Onyń 3-ýinde qarsylasyn ýaqytyna jetpeı tize búktirgen.

Jekpe-jektiń qashan ári qaıda bolatyny ázirge belgisiz.

«Bul jekpe-jek Fırýzanyń Eva Valstremmen kezdesýine daıyndyq bolmaq. Tolyq aqparat jekpe-jekke qaǵaz júzinde sanktsııa alǵanda bir-aq belgili bolady», - dedi Sháripovanyń menedjeri Sergeı Zavıleıskıı.

Aıta ketý kerek, Fırýza Sháripova 30-jeltoqsanda Almatyda belgııalyq Djemılla Gontarıýkty tize búktirgen bolatyn.

Endi Fırýza fın sportshysy Eva Valstremmen 2018 jyldyń qazanynda Monakoda kezdesedi.