Fırýza Sharıpovanyń kelesi jekpe-jeginiń ýaqyty belgili boldy
2018 jylǵy 8 qyrkúıekte Reseıdiń Sankt-Peterbýrg qalasynda qazaqstandyq boksshy Fırýza Sharıpova (8-1, 4 KO) ıspanııalyq boksshy Mırıam Gýterrespen rıngke shyǵady.
«Meniń maqsatym - kásibı boksta absolıýtti chempıon ataný. Ol úshin bar múmkindigimdi paıdalanamyn. Mırıam Gýterrestiń tehnıkasy myqty, ol jyldam ári kásibı boksta jeńilip kórmegen. Gýterresti Gontarıýkıge qaraǵanda jeńý ońaıǵa soqpaıdy, sebebi Djemılla Gontarıýkı judyryqtasqan kezde bir ornynda kóp turyp qalady. Onyń ústine ıspanııalyq boksshynyń boıy menen uzyn jáne men basqa salmaq dárejesinde judyryqtasamyn. Soǵan qaramastan men ózime jáne komandama senemin», - dedi Fırýza Sharıpova
Fırýza Sharıpovanyń qarsylasy ıspanııalyq boksshy Mırıam Gýterres kásibı boksta 8 jekpe-jek ótkizip, barlyǵynda jeńiske jetken. Kezdesýde WBO tıtýly sarapqa salynady.
Sonymen qatar Fırýza Sharıpova kezekti kúresin Denıs Tenniń rýhyna arnaıtynyn atap ótti.
«Fırýza úshinshi salmaq dárejesinde óner kórsetkeli otyr. Eger ol jeńiske jetse, úsh salmaq dárejesinde chempıon atanady. Osyǵan deıin Qazaqstannan eshkim mundaı jetistikke jetpegen. Al álemde mundaı jetistikke jetken sportshylar az», - dedi boksshy menedjeri Sergeı Zavıleıskıı.
Esterińizge sala keteıik, Sharıpovanyń sońǵy jekpe-jegi 2017 jyly 30 jeltoqsanda Almaty qalasynda ótti. Ol belgııalyq boksshy Djemılla Gontarıýkıdi (13-5-1, 2 KO) jeńip, WBC Silver jáne IBO tıtýldaryna ıe boldy.
Foto: fsk-promotion.com