Fırýza Sháripovanyń bapkeri áıelder arasyndaǵy el chempıonatyna qatysty pikir bildirdi
ASTANA. QazAqparat - Qazaqstannyń kásipqoı boksshysy Fırýza Sháripovanyń bapkeri Erik Balǵabek elde ótkizilgeli otyrǵan bokstan áıelder arasyndaǵy Qazaqstan chempıonatyna qatysty pikir bildirdi, dep xabarlaıdy QazAqparat.
"El chempıonaty - barlyq sportshy úshin eń mańyzdy jáne jaýapty týrnırlerdiń biri. Aldaǵy birinshilik Qazaqstannyń qyzdar arasyndaǵy boks deńgeıin kórsetetin bolady jáne kim qandaı dárejege laıyq ekendigin anyqtaıdy. Qazir jas ta bolsa, talanty sportshy qyzdar kóp. Sondyqtan týrnırdiń aıqyn favorıtteri týraly aıtý áli erte", - deıdi bapker.
Erik Balǵabek birinshilikke Jambyl oblysynyń komandasyn daıyndap, alyp kelip otyr. Onyń pikirinshe, onyń qol astyndaǵy sportshylar QR chempıonatynda júlde alyp qalýy ábden múmkin.
"Bizdiń komanda jańardy, birinshi nómirli boksshy bolǵan qyzdarymyzdyń deni turmys quryp, náresteli bolyp jatyr. Qazir quramamyzda negizinen jas sportshylar jınaqtalǵan jáne bul olardyń eń alǵashqy úlken týrnıri. Jambyl boksy esh ýaqytta júldeden kende qalǵan emes, aldaǵy chempıonatta da oryn alamyz dep oılaımyn", - dedi ol.
Eske sala keteıik, bokstan qyzdar arasyndaǵy Qazaqstan chempıonaty Astanada 3-9 mamyr kúnderi aralyǵynda ótedi.
