Fırýza Sháripovaǵa chempıondyq belbeýin qaıtarý úshin qansha qarajat kerek

NUR-SULTAN. QazAqparat - Qazaqstandyq kásipqoı boksshy Fırýza Sháripova Mádenıet jáne sport mınıstrliginiń chempıondyq jekpe-jekke qarajat bólý týraly málimdemesine qatysty pikir bildirdi, dep habarlaıdy QazAqparat tilshisi.

«Biz Mádenıet jáne sport mınıstrligine jáne mınıstr Arystanbek Muhamedıulyna zor alǵysymyzdy bildiremiz. 2018 jyldyń mamyr aıynda bizge kórsetilgen qarjylyq kómektiń arqasynda ótken jyldyń 9 qyrkúıeginde Sankt-Peterbýrgte aıqas ótkizip, jeńil salmaqtaǵy WIBA nusqasy boıynsha álem chempıony tıtýlyn saqtap qaldym», - dep jazady sportshy Instagram paraqshasynda.

Boksshy óziniń chempıondyq belbeýin saqtap qalý úshin qansha qarajat kerek ekenin de jasyrmady.

«Osydan keıin-aq maǵan birden IBO nusqasy boıynsha álem chempıony jáne WBC Silver belbeýi úshin aıqas ótkizý kerek edi. Osy jáne ekinshi jartylaı salmaqta tolyqqandy WBC álem chempıony jańa tıtýlyn jeńip alý úshin biz Eva Valstremmen kelisimge kelgen edik. Alaıda 500 myń dollar kóleminde qarajat taba almadyq», - deıdi boksshy.

Onyń aıtýyna qaraǵanda, tartyp alynǵan belbeýler úshin atalǵan qarajat áli de qajet.

«Men eki salmaq boıynsha álem chempıony edim. Endi qazir bir salmaqtaǵy osyndaı mártebemnen aıyrylyp qaldym. Tartyp alynǵan belbeý pen jańa tıtýldy jeńip alý úshin 500 myń dollar kerek. Keıbir BAQ-ta aqparat durys jarııalanbaı jatyr. Biz eshkimdi kinálap turǵan joqpyz. Jaı ǵana aıqasymdy ótkizý úshin qarjylyq kómek suraımyz. Bul - eń mártebeli tıtýl jáne álemdegi eń úzdik qarsylaspen bolatyn jekpe-jek», - deıdi sportshy.

Eske sala ketsek, Fırýza Sháripova IBO tujyrymy boıynsha álem chempıony tıtýlynan jáne WBC Silver belbeýinen aıyrylǵany osyǵan deıin habarlanǵan bolatyn. Oǵan qatysty sportshy:

«Bul - qalypty jaǵdaı, sebebi bir jyldan beri qorǵalǵan joq. Chempıon óz belbeýin qorǵaýy tıis. Ótken jyldyń sońynda Eva Valstremmen birlesken aıqas ótkizýdi josparladyq. Ol - WBC tujyrymy boıynsha chempıondyq tıtýldyń ıegeri. Qarjylandyrýǵa kómek suradyq. Ákimdikter men Mádenıet jáne sport mınıstrine hat joldadyq. Ókinishke qaraı, bizge qarajat tabylmady», - degen edi.

Sportshynyń osy sózinen keıin QR Mádenıet jáne sport mınıstrligi kásipqoı boksshy Fırýza Sháripovanyń málimdemesine resmı túrde jaýap berdi.