Fırýza Sháripova «Jyl adamy» atanýy múmkin

ALMATY. QazAqparat - Eki salmaq sanatynda birneshe chempıondyq belbeýdiń ıesi, qazaqstandyq kásipqoı boksshy Fırýza Sháripova «Jyl sportshysy» atalymynda jeńiske jetip, «Altyn Adam - Jyl adamy» syılyǵynyń laýreaty bolýy múmkin, dep habarlaıdy QazAqparat tilshisi.

Saltanatty marapattaý rásimi 20 qarasha kúni 18:30-da Almatydaǵy Abaı atyndaǵy Qazaq memlekettik akademııalyq opera jáne balet teatrynda bolady. Jyl saıynǵy saltanatty shara osymen 19-shy ret ótkizilip otyr. Al jeńimpazdarǵa jobanyń bas júldesi - «Altyn Adam» músinshesi, «Qoǵamdyq moıyndaý» jáne «№1 Jyl tańdaýy» qurmetti medaldary beriledi.

Aıta keteıik, buǵan deıin «Jyl sportshysy» atalymynda boksshy Qanat Islam, Olımpıada oıyndarynda júzýden altyn medal alǵan tuńǵysh qazaqstandyq Dmıtrıı Balandın, WBC, WBA, IBF, IBO tujyrymdary boıynsha burynǵy álem chempıony Gennadıı Golovkın, aýyr atlet, úsh salmaq sanatynda tórt dúrkin álem chempıony Ilıa Ilın sııaqty sportshylar jeńiske jetken.

Marapattaý rásiminde laýreattar, sonyń ishinde Zarına Altynbaeva, «Turan» toby, Іlııas Aýtov jáne Motor-Roller toby, Qýat Baǵysbekov, Irena Aravına men Evgenıı Jumanov, Denıza Mýstafınalar óner kórsetedi.