Fırýza Sháripova WBA reıtınginde kósh bastady

ASTANA. QazAqparat - Qazaqstandyq kásipqoı boksshy Fırýza Sháripova halyqaralyq WBA reıtıngi boıynsha úzdik sportshy atandy, dep habarlaıdy QazAqparat tilshisi boksshynyń baspasóz qyzmetine silteme jasap.

«Eki salmaq dárejesi boıynsha kásibı bokstan álem chempıony Fırýza Sháripova WBA reıtınginde 1-orynǵa turaqtady. Bul Fırýzany qazirgi kúni Ketı Teılorǵa tıesili chempıondyq beldikke mindetti úmitkerdiń biri etedi», -delingen habarlamada.

Búkilálemdik boks qaýymdastyǵy (WBA) - kásibı boks sportyndaǵy ejelden kele jatqan halyqaralyq uıym. WBA nusqasy boıynsha Muhammed Álı, Maık Taıson, Gennadıı Golovkın jáne basqa da tanymal boksshylar chempıon atanǵan.

Aıta ketsek, Fırýza Sháripova - bokstan jeńil jáne jartylaı jeńil salmaq boıynsha Qazaqstannan shyqqan alǵashqy álem chempıony. Boksshy WBA nusqasy boıynsha kelesi jekpe-jegin fınlıandııalyq Eva Valstremmen ótkizýdi josparlap otyr.