Fırýza Sharıpova rıngtegi izbasaryn tanystyrdy
ALMATY. QazAqparat - Fırýza Sharıpovanyń 7 jastaǵy sińlisi kásipqoı boks jolyna tústi. Ol týraly qazaqstandyq boksshynyń ózi málim etti, dep habarlaıdy QazAqparat.
WBC Silver jáne ekinshi jartylaı jeńil salmaq boıynsha (59 keli) IBO Championship, WIBA jáne WBU nusqasy boıynsha álem chempıony Fırýza Sharıpova 7 jastaǵy sińlisi Rýsalınanyń boksshy bolatynyn aıtyp, kópshilikke tanystyrdy. Jas jetkinshekti boks álemine Fırýza Sharıpova ózi qurǵan «FSK Promotion» promoýter kompanııasy jeteleıtin bolady. 7 jastaǵy Rýsalına Sharıpova búginde Tarazdaǵy Boks kesheninde jattyǵyp júrgen kórinedi.
«Rýsalına maǵan qaraǵanda minezdirek, batylyraq. Onyń boıynda boksshyǵa qajetti qasıettiń bári bar. Onyń osy bastan maqsatyn aıqyndaǵany, meni úlgi tutqany qýantady», - dedi Fırýza Sharıpova.
Aıta keteıik, Fırýza Sharıpovanyń «FSK Promotion» kompanııasy kásibı boksta tabysqa jetkisi keletin talanttarǵa izdeý jarııalaǵan bolatyn.
«Tarazda Rýsalınanyń ata-anasymen kezdestim. Balada boksshyǵa kerektiniń barlyǵy, eń bastysy, talpynysy bar ekeni baıqalady. Bul jerde bıik nátıjelerge jetip júrgen ápkesiniń de róli yqpal etetinin aıta ketý kerek. Biz óz tarapymyzdan Rýsalınanyń alǵashqy qadamynan qoldaý kórsetip, áýesqoı bokstan kásibı rıngke deıin jetekshilik etetin bolamyz», - dedi Fırýza Sharıpovanyń menedjeri, «FSKPromotion» kompanııasynyń bas prodıýseri Sergeı Zavıleıskıı.
Eske sala keteıik, Fırýza Sharıpova «FSKPromotion» kompanııasyn 2017 jyldyń jazynda quryp, 26 tamyzynda «EKSPO-2017» kórmesi aıasynda alǵashqy boks keshin uıymdastyrdy. Kezdesýde Fırýza Sharıpova basty qarsylasy bolgar qyzy Mılen Kolevany jeńip, WIBA jáne WBU tıtýldaryn utyp aldy.
