Fırýza Sháripova ózin jeńgen ırlandııalyq boksshymen revansh ótkizbek

NUR-SULTAN. QazAqparat - Fırýza Sháripovanyń menedjeri Sergeı Zavıleıskıı álemniń absolıýtti chempıony Ketı Teılormen ótken jekpe-jekten keıin boksshynyń aldaǵy josparlarymen bólisti, dep habarlaıdy QazAqparat Sports.kz saıtyna silteme jasap.

«Biz revansh uıymdastyrýdy josparlap otyrmyz. Sondaı-aq Sofıa Ochıgavamen jekpe-jek ótkizýdi qarastyrýdamyz. Fırýza úlken aıqastardy qalap otyr. Ol myqty qarsylastarmen bokstasýǵa laıyqty ekenin kórsete bildi. Búginde jeńil salmaqtaǵy úzdikter – Ketı Teılor men Sofıa Ochıgava.

Teılordyń revansh ótkizýge ońaılyqpen kelise qoımaıtyny túsinikti, sebebi munyń qanshalyqty qaýipti ekenin túsinip otyr. Ketıdiń komandasy da bizdi laıyqty baǵalaı aldy. Qazirgi kezde biz Teılordyń Fırýzadan qorǵanýyn mindetteıtin nusqany tańdap otyrmyz.

Fırýza kelesi jekpe-jegin kóktemde ótkizedi dep oılaımyz. Ázirge josparda – demalý. Keshe ǵana Reseıge qaıtyp keldik. Aldaǵy kúnderi Fırýza úıine, Qazaqstanǵa ketedi. Fırýza Teılordyń onyń basyna salǵan soqqylarynan keıin tigisteri sheshilgen soń, kelesi jekpe-jekke daıyndala bastaımyz», - dep baıandady S.Zavıleıskıı.

Eske sala ketsek, Sháripova-Teılor jekpe-jegi Lıverpýlde (Ulybrıtanııa), jeltoqsannyń 11-nen 12-ne qaraǵan túni ótti. Teılor tóreshilerdiń biraýyzdan qabyldaǵan sheshimimen jeńiske jetti. Aıqas jeńimpazy WBC, WBA, WBO, IBF jáne The Ring nusqalary boıynsha jeńil salmaqtaǵy álem chempıonynyń beldikterine ıe boldy.

F.Sháripova bul aıqas úshin 100 myń dollar gonorar aldy.