Fırýza Sháripova nelikten tıtýlynan aıyrylyp qaldy
«Bul - qalypty jaǵdaı, sebebi bir jyldan beri qorǵalǵan joq. Chempıon óz belbeýin qorǵaýy tıis. Ótken jyldyń sońynda Eva Valstremmen birlesken aıqas ótkizýdi josparladyq. Ol - WBC tujyrymy boıynsha chempıondyq tıtýldyń ıegeri. Qarjylandyrýǵa kómek suradyq. Ákimdikter men Mádenıet jáne sport mınıstrine hat joldadyq. Ókinishke qaraı, bizge qarajat tabylmady», - dedi F. Sháripova.
Onyń aıtýynsha, E. Valstrem úlken kólemdegi gonorar suraǵan.
«Munyń aldynda WIBA tıtýlyn qorǵadym, sondyqtan men osy nusqadaǵy álem chempıonymyn. Men belbeýlerimdi joǵaltqan joqpyn, kelesi aıqasta ony rıngke alyp shyǵamyn. Men osy nusqadaǵy qazirgi álem chempıony mártebesinen aıyryldym. Bul meniń jáne komandamnyń kinási emes - men odan aıqasta jeńilgendikten aıyrylmadym. Qazaqstanda bizdi eshkim qoldaǵan joq», - dep atap ótti ol.
Sportshy munymen toqtap qalmaı, basqa salmaq dárejesinde tıtýlyn qorǵamaq.
«Qazirgi ýaqytta 63,5 keli salmaq dárejesinde álem chempıony tıtýlyn ıelený úshin jumys istep jatyrmyz. Qazir demeýshi izdestirý ústindemiz, bul másele áli sheshilgen joq. Kún saıyn seriktestik týraly usynystar joldap jatyrmyz, biraq eshkim áli kelisim bermedi», - dep atap ótti F.Sháripova.
Budan buryn BAQ-ta F.Sháripovanyń IBO tujyrymy boıynsha ekinshi jartylaı jeńil salmaqtaǵy álem chempıony ataǵynan aıyrylǵany týraly aqparat jarııalanǵan edi.
Avtor: Azamat Syzdyqbaev