Fırýza Sháripova men Krıstına Hammerdi ulttyq quramaǵa shaqyrdy
QR Boks federatsııasynyń málimetinshe, Vadım Prısıajnıýk atalǵan boksshy qyzdardy elimizdiń qyzdar ulttyq quramasynyń sapyna kirip, aldaǵy ýaqytta ótetin jarystarǵa qatysýǵa usynys jasaǵan.
«Eger adam bir nárse jasaǵysy kelse, onda sózden iske kirisedi. Biz Fırýza Sháripovany birneshe márte shaqyryp, Krıstına Hammerdiń týystaryna qońyraý shaldyq. Olardy Qazaqstanǵa kelip, ózderin kórsetýin ótindik. Alaıda, olarǵa muny jasaýǵa áıteýir bir jaǵdaılar únemi kedergi bolyp keledi. Endi Qazaqstan Boks federatsııasynyń atynan jáne bas bapker retinde Sháripova men Hammerdi Qazaqstanǵa kelip, mamyrda Shymkentte ótetin respýblıkalyq spartakıadaǵa nemese shildede Nur-Sultanda ótetin Prezıdent kýbogyna qatysýǵa shaqyramyn. Jan-jaqty járdem kórsetýge ýáde beremin. Tokıo Olımpıadasyna az ýaqyt qaldy, áreket etý qajet. Ne bolmasa bul máselede pıar jasaýdy doǵaryp, sońǵy núkte qoıý kerek», - dedi V.Prısıajnıýk.
Aıta keteıik, 2019 jyldyń basynda WBO nusqasy boıynsha álem chempıony Krıstına Hammer men kásibı boksta birneshe belbeýge ıe bolǵan Fırýza Sháripova Olımpıada oıyndarynda Qazaqstan atynan jarys jolyna shyǵýǵa nıetti ekendikterin málim etken bolatyn.
Sháripovanyń menedjeriniń aqparatyna qaraǵanda, Fırýzaǵa basqa memlekettiń týy astynda Olımpıada oıyndarynda jarys jolyna shyǵýy úshin mıllıon dollar usynylǵan. Biraq, sportshy mundaı usynystan bas tartqan.
60 keli salmaq sanatyna deıin bokstan qyzdar quramasynyń kóshbasshylary, álem chempıonatynyń júldegerleri Karına Ibragımova men Aıjan Qojabekova jáne eýropalyq týrnır chempıony Rımma Volosenko da Fırýza Sháripovaǵa vıdeoúndeý joldap, Qazaqstanǵa shaqyrdy.
«Fırýza, biz seni qurmetteımiz jáne kásibı boksqa aýysý sheshimińdi de qoldaımyz. Seni spartakıadada kútemiz, Prezıdent kýbogy da ótedi. Kelip ózińniń bizden myqty ári úzdik ekenińdi dálelde», - deıdi boksshy qyzdar úndeýlerinde.