Fırýza Sháripova komandasy taǵy bir boksshymen tolyqty
Sportshynyń baspasóz qyzmeti habarlaǵandaı, boksshymen ázirge tek eki jekpe-jek ótkizýge qol qoıyldy.
«Konstantınniń bolashaǵy zor. Biz eki jekpe-jekke kelisimshart jasadyq, ári qaraı jekpe-jek nátıjelerinen keıin qujatty qaıta qaraımyz. Jaqyn arada birinshi kezdesý ótkizemiz. Aldaǵy ýaqytta biz taǵy bir áleýeti zor qazaqstandyq boksshymen seriktestik týraly jarııalaımyz», - dedi Sháripova men Brýsenskııdiń menedjeri Sergeı Zavıleıskıı.
23 jastaǵy Konstantın Brýsenskıı Almaty oblysynyń Balpyq bı aýylynda dúnıege kelgen. Óziniń áýesqoı mansabynda Almaty, Almaty oblysy jáne Qazaqstan chempıony atanǵan. Búkilreseılik boks týrnıriniń A klasy boıynsha kúmis júldegeri, Qazaq handyǵynyń 550 jyldyǵyna arnalǵan boks týrnıriniń jáne basqa da iri jarystardyń jeńimpazy.
Fırýza Sháripova - Qazaqstan atynan kásipqoı boksqa shyqqan alǵashqy qyz. Ol eń birinshi belbeýin bir jyl úsh aıdan keıin-aq jeńip aldy. Kelesi jekpe-jekti WBC nusqasy boıynsha álem chempıony fınlıandııalyq Eva Valstremge qarsy ótkizedi. Al onyń jeńimpazy ekinshi jartylaı jeńil salmaqtaǵy eń úzdik boksshy sanalady, óıtkeni Fırýza IBO Championship belbeýine ıe.
Aıta ketsek, osyǵan deıin Fırýza Sháripovanyń bapkerlerin aýystyrǵanyn jazǵan bolatynbyz
Oljas Omarbek