Fırýza Sharıpova kezekti jekpe-jegine «Astana» Prezıdenttik klýbynyń atynan shyǵady
Qazaqstandyq kásibı boksshy (8-1-0,4KO), eki salmaq dárejesi boıynsha WIBA, IBO jáne WBC Silver tujyrymdarynyń chempıon belbeýiniń ıegeri Fırýza Sharıpova aldaǵy ýaqytta bokstaǵy jekpe jekterine «Astana» Prezıdenttik kásibı sport klýbynyń atynan shyǵatyny týraly arnaıy ótkizilgen baspasóz máslıhatynda málim boldy.
«Kásibı boksqa kelgen kúnnen bastap armanym - Prezıdent klýbynyń atynan shyǵý boldy, mine ol armanym da oryndaldy. Men búkilálemdik boks serııasynyń eń úzdik komandalarynyń qataryna jatatyn «Astana Arlans» boksshylaryn únemi qoldap júretin jankúıerimin. Rıngke «Astana» brendiniń atynan shyǵý - men úshin qurmet. Endi áıelder arasyndaǵy kásibı boksta úzdik bolyp, barlyq negizgi tıtýldardy jeńý jolynda aıaýsyz eńbektenemin. Jáne «Astana» Prezıdenttik klýbymen birge absolıýtti álem chempıony atanatynyma senimdimin», - dedi Fırýza Sharıpova. 
Sonymen qatar, baspasóz máslıhaty barysynda qazaqstandyq kásibı boksshy Fırýza Sharıpova týraly derekti fılm kórsetildi. Jarty saǵattyq derekti fılmde Fırýza Sharıpovanyń boks sportyna kelýi men kásibı turǵyda qalyptasý tarıhy baıandalady. Fılmde boksshynyń jattyqtyrýshysy men sporttaǵy áriptesteri Fırýzanyń kásibı bokstaǵy jetistikteri men jeke qasıetteri týraly sóz etedi.
Fılm tusaýkeserine Fırýza Sharıpova, menedjeri Sergeı Zavıleıskıı jáne boksshynyń sporttaǵy jaqyn áriptesteri men jankúıerleri qatysty.
Aıta keteıik, buǵan deıin Fırýza Sharıpovanyń kezekti jekpe-jegi ótetini týraly jazǵan bolatynbyz.