Fırýza Sharıpova qazaqstandyq bokstyń jańa belesin baǵyndyrýǵa nıetti
ASTANA. QazAqparat - Kásipqoı bokstaǵy tuńǵysh qazaqstandyq qyz, WIBA jáne WBU boıynsha jeńil salmaqtaǵy álem chempıony Fırýza Sharıpova Almatyda tıtýldy kezdesý ótkizedi, dep habarlaıdy QazAqparat Feısbýktegi "Qazaqstannyń kásipqoı boksy" paraqshasyna silteme jasap.
17 jeltoqsan kúni 12 myń orynǵa shaqtalǵan "Almaty-Arenada" F.Sharıpovanyń FSK Promotion kompanııasy uıymdastyratyn kásipqoı boks keshi ótedi. Basty kezdesýde qazaqstandyq boksshy ekinshi jartylaı jeńil salmaqtaǵy chempıondyq ataq úshin aıqasqa túsedi.
"Fırýza atalǵan jekpe-jekte jeńiske jetse, eki salmaq kategorııasyndaǵy belbeýlerge ıe bolady, bul qazaqstandyq boks tarıhyndaǵy jańa beles", - dep jazdy "Qazaqstannyń kásipqoı boksy".
Eske sala ketsek, 26 tamyz kúni Astanada ótken boks keshinde Fırýza Sharıpova bolgarııalyq Mılena Kolevadan basym túsip, WIBA jáne WBU boıynsha jeńil salmaqtaǵy álem chempıony ataǵyn jeńip aldy.
Atap ótken jón, Fırýza Sharıpova - Qazaqstannyń kásibı áıelder boksyndaǵy tuńǵysh álem chempıony.
