Fırýza Sháripova GGG men «Kanelonyń» úshinshi aıqasyna boljam jasady

NUR-SULTAN. QazAqparat - Kásipqoı bokstan álem chempıony Fırýza Sháripova meksıkalyq Saýl Alvares pen amerıkalyq Denıel Djeıkobstyń jekpe-jegine qatysty pikir bildirdi, dep habarlaıdy QazAqparat tilshisi.

«Aıqas ish pystyryp jiberdi. Kóńilim qaldy. Qanshama aqsha shashylyp, qanshama áńgimeler aıtylǵanymen, aqyry shoý bolmaı qaldy. Álbette, «Kanelo» men Djeıkobs naǵyz jaýyngerler. Biraq, olar men aqsha shasharlyq búgin sharshy alańda eshteńe kórsete almady», - deıdi Fırýza Sháripova.

Sonymen qatar, chempıon Gennadıı Golovkın men Saýl «Kanelo» Alvarestiń arasyndaǵy bolýy yqtımal aıqasqa qatysty pikirin aıtty.

«Golovkın men «Kanelonyń» úshinshi jekpe-jegin kóremin degen úmittenemin. Gennadıı ony sońyna deıin «ezip» tastasa eken. Mine, sol kezde biz naǵyz Big Drama Show-dy kóre alar edik. Al shynaıy boks ne ekenin kórý úshin meniń ıÝlııa Kýtsenkomen aıqasymdy kórińizder der edim. Ol jekpe-jek Halyqaralyq boks forýmynda 16 maýsymda ótedi», - deıdi sportshy boıjetken.

Eske sala ketsek, Las-Vegasta (AQSh) meksıkalyq Saýl Alvares pen amerıkalyq Denıel Djeıkobs arasynda WBC, WBA jáne IBF nusqalary boıynsha orta salmaqtaǵy (72,6 kg deıin) álem chempıony tıtýldaryna qatysty jekpe-jek ótken bolatyn.

Chempıondar arasyndaǵy aıqas 12 raýndqa sozylyp, tóreshilerdiń biraýyzdan shyǵarǵan sheshimimen 115-113, 115-113 jáne 116-112 esebimen jeńis Saýl Alvareske berildi. Alaıda, absolıýtti álem chempıondyǵyna deıin meksıkalyq boksshyǵa Demetrıýs Andare ıelengen WBO belbeýi jetispeıdi. Aıta keteıik, Alvares pen Djeıkobstyń ekeýi de Gennadıı Golovkınniń burynǵy qarsylastary. Qazaqstandyq boksshy óziniń jańa jattyqtyrýshysy Djonatan Benkspen jekpe-jekti tamashalady.