Fırýza Sháripova Floıd Maıvezerdiń boks akademııasynda master-klass ótkizedi
ASTANA. QazAqparat - Qazaqstannyń birneshe dúrkin chempıony, 22 jastaǵy kásipqoı boksshy, Azııa chempıonatynyń júldegeri Fırýza Sháripova Reseıdiń Jýkovka kentindegi Floıd Meıvezer atyndaǵy boks akademııasynda sheberlik sabaǵyn ótkizedi, dep habarlaıdy QazAqparat agenttigi.
Qazaqstannyń boksshy qyzy Akademııa dırektory Oleg Jadobınmen kezdesken kezde, ol Fırýza Sháripovaǵa osyndaı usynys aıtqan eken. Sheberlik sabaǵy shamamen 23 aqpan kúni ótedi dep josparlanǵan.
«1 saǵat kóleminde ótetin master-klassqa kelem deýshilerge esik ashyq, tegin ótedi. Sheberlik sabaǵyna jasyna, sporttaǵy mártebesine, daıyndyq deńgeıine qaramaı, kez kelgen adam kele berýine bolady», - deıdi Fırýza agenttik tilshisimen áńgimelese otyryp.
Fırýza Sháripova sondaı-aq bizge búgin fotosessııa ótetinin de habarlady.
«Oleg Jadobın atap ótkendeı, bul fotosessııa kóp basylymdarǵa taptyrmas sýret bolady eken. Sýretterimdi Akademııanyń baspasóz qyzmeti taratady», - deıdi Fırýza.
Fırýza Sháripova Taraz qalasynda týǵan. Ol osymen úshinshi ret kásipqoı rıngta bokstasqan sportshy. Eń alǵash ret Máskeýde 2012 jylǵy Olımpıada oıyndarynyń kúmis júldegeri Sofııa Ochıgavaǵa ese jibergen Fırýza ekinshi jekpe-jeginde ıtalıandyq sportshy Anjelo Kanetsarony jeńip, úshinshi jekpe-jeginde serbııalyq boksshy Mılen Matovıchty utqan bolatyn.
2017 jyldyń kókteminde Fırýza tıtýldy jekpe-jegin ótkizemin dep josparlap otyr. Qazir sportshy Máskeýde sheberlik sabaǵyna daıyndalyp jatyr.
