Fırýza Sháripova Djemılla Gontarıýkpen jekpe-jekke qalaı daıyndalyp jatqanyn aıtty
ALMATY. QazAqparat - Qazaqstandyq bylǵary qolǵap sheberi Fırýza Sháripova Djemılla Gontarıýkpen jekpe-jekke qalaı daıyndalyp jatqanyn aıtty, dep habarlaıdy QazAqparat tilshisi.
30 jeltoqsanda Almatyda ótetin boks keshinde Fırýza 59 keli salmaq dárejesindegi WBC Silver tıtýly úshin belgııalyq Djemılla Gontarıýkpen qolǵap túıistiredi.
Baspasóz máslıhaty kezinde Fırýza jekpe-jekke tas- túıin daıyn ekendigin aıtty.
«Pıtbýl laqap aty bar Djemılladan qorqyp otyrǵan joqpyn. Bul saıysqa 100 paıyz daıynmyn. Boks keshine kelińizder. Onda sizderge erekshe tosyn syı kórsetiledi. Meniń ómirim týraly beınerolık. Ony ózim de kesh bildim. Júregimdi selt etkizdi», - dedi ol.
Boksshynyń promoýterlik kompanııasynyń tehnıkalyq dırektory Pavel Badyrov daıyndyq týraly biraz qupııanyń betin ashty.
«Fırýza boks, fýnktsıonaldyq daıyndyq, adam aǵzasyn baqylaýdyń zamanaýı tehnologııasyn paıdalana otyryp birneshe bapkermen jattyǵyp jatyr. Al, boks- kúrdeli sport túri. Boksta óte az ýaqytta, qarsylastyń soqqysynyń astynda turyp ekstremaldy jaǵdaıda kúrdeli tapsyrmalardy sheshý kerek»,- dedi Pavel Badyrov.
Munyń aldynda Fırýzanyń menedjeri Sergeı Zavıleıskıı bul jekpe-jektegi jeńis Fırýzaǵa ne beretini týraly aıtqan bolatyn.
«Fırýza Olımpıadalyq altynǵa qol jetkizýge múddeli. Biz tez arada kásibı boksta barlyq tıtýldardy jeńip alyp, Álemniń absolıýtti chempıony bolýdy josparlap otyrmyz. Sodan soń Tokıoda ótetin jazǵy Olımpıadaǵa qatysý oıda bar»,- dedi Sergeı Zavıleıskıı.
