Fırýza Sháripova Almatyda jekpe-jek ótkizbeıtin boldy
Fırýza buǵan deıin WBO, IBF jáne IBO tujyrymdary boıynsha álem chempıony beldigi sarapqa salynatyn jekpe-jekti Almatyda, 24 naýryz kúni ótkizýge daıyn ekenin málimdegen bolatyn.
«Suleimen Boxing Promotions osy boks keshindegi meniń jekpe-jegimdi qarjylandyrýǵa daıyn emes, biz olarmen kelisimshart jasap, osy kompanııanyń aıasynda kezdesý ótkizýdi usynyp edik. Men Nursultan Ábishulyna buryn elimizde bolmaǵan WBO beldigin syıǵa tartqym kelip edi. Ókinishke qaraı, muny osy aıda iske asyra almaımyn. Qazaqstanda osy shara úshin 150-200 myń dollar shyǵarýǵa shamasy jetetin kásipker tabylmaǵany ma? Óıtkeni men jankúıerlerge naǵyz mereke jáne búkil Qazaqstan úshin jańa jetistik syılaý úshin gonorarsyz-aq jekpe-jek ótkizýge kelisim berdim. Qarjy tapqan boıda men búkil mańyzdy tıtýldardy jeńip alamyn», - dep jazdy Sháripova.
Qazaqstannyń kásipqoı boksy paraqshasynda málim etilgendeı, uıymdastyrýshylar qazaqstandyq boksshy qyzǵa rıngti usynýǵa daıyn ekenin bildirgen.
«Fırýza Sháripovanyń óz menedjeri men promoýteri bar. Boksshynyń jekpe-jekterin uıymdastyrý - solardyń qolynda. Suleimen Promotions qaıyrymdylyq uıym emes, onyń óz maqsat-mindetteri bar. Fırýza Sháripovanyń boks keshine qatysý múmkindigi týraly mynany aıtqymyz keledi, biz onsyz da uıymdastyrýǵa ketetin qarajattardyń barlyǵyn mindetimizge alyp otyrmyz. Onyń jekpe-jek ótkizýine qajetti ýaqytty da, rıngti de berýge daıynbyz. Oǵan tek qarsylasymen birge Almatyǵa kelý ǵana qalyp otyr. Onyń promoýterine de osyny aıttyq», - deıdi kompanııa ókilderi.