Fırdoýsıdiń «Shahnamesi» Qazaqstanǵa jetkizildi

ASTANA. 9 qazan. QazAqparat - Álemdik ádebıettiń kórnekti ókili, parsy-tájik aqyny Fırdoýsıdiń «Shahname» dastany Qazaqstanǵa jetkizildi. Osyǵan oraı, búgin Astanadaǵy Ulttyq akademııalyq kitaphanada atalǵan shyǵarmanyń tanystyrylymy boldy.

Búginde «Shahnameniń» qypshaq tilindegi túpnusqasy tájik elinde saqtalǵan. Al onyń kóshirmesin Qazaqstanǵa belgili jazýshy Rollan Seısenbaev alyp keldi. «Kezinde búkil Deshti-qypshaq dalasynyń qypshaq tilinde sóılegeni belgili. Shyńǵys hannyń bıligi kezinde de bul til óz mańyzdylyǵyn joımaǵan. Búgingi armıan, grýzın sııaqty ulttardyń álippesi qypshaq tiliniń negizinde quryldy. Ony bári biledi. Sondyqtan Fırdoýsıdiń «Shahnamesi» bizdiń tarıhymyz úshin de qundy jádigerlerdiń biri bolyp sanalady», - deıdi R.Seısenbaev. Onyń sózine qaraǵanda, Qazaqstanǵa jetkizilgen «Shahname» dastany Ulybrıtanııada jańartylyp, 500 dana bolyp Túrkııa elinde basyldy. Ony elimizdiń barlyq ulttyq kitaphanalary men joǵary oqý oryndaryna taratý josparlanyp otyr.