Fınlıandııanyń Finnair áýe kompanııasy ushar aldynda jolaýshylardyń salmaǵyn ólsheıdi
ASTANA. QazAqparat - Finnair áýe kompanııasy ushaqtaǵy júktiń qanshalyqty ekendigin bilý úshin ushý aldynan jolaýshylardyń salmaǵyn ólsheıdi, dep jazady Metropolitan.
Salmaq ólsheý erikti túrde júzege asyrylady. Kompanııa ony 2017 jyldyń qarashasynan bastamaq. Finnair ár reıstiń shamamen 100-150 jolaýshysy men olardyń júgi týraly málimet jınaı alatynyna úmit artyp otyr. Kompanııadaǵylar óz salmaǵyn jolaýshynyń tek ózi ǵana bile alatyndyǵyn, al jalpy aqparat málimetter bazasynda anonımdi túrde jınaqtalatyndyǵyn aıtady.
Qazir kompanııa Eýropa Avıatsııa qaýipsizdigi agentiginiń (EASA) 2009 jylǵy málimetterine ıek artady. Agenttiktiń derekterine qaraǵanda, qol júgi bar er adamnyń ortasha salmaǵy - 88 kg, áıelder - 70 kg, 12 jasqa deıingi balalar - 35 kg aınalasynda bolady.
2012 jylǵy statıstıkalyq málimetter boıynsha, fınderdiń ortasha salmaǵy 85,5 kg, áıelder 70,4 kg shamasynda, dep jazady basylym.
