Fınlıandııanyń eks-prezıdenti úısiz-kúısiz janǵa aınaldy
ASTANA. QazAqparat - Fınlıandııanyń burynǵy prezıdenti Tarıa Halonen Helsınkı kóshelerinde baspanasyz jannyń keıpine endi.
Saıasatker «Qutqarý armııasy» uıymdastyrǵan kedeıshilikpen kúres naýqany aıasynda osyndaı qadamǵa bardy.
Bul aktsııanyń maqsaty - baqytsyzdyqqa kez kelgen adamnyń ushyraýy múmkin ekendigin kórsetý, sondaı-aq azamattardy qaıǵyǵa ushyraǵandarǵa nemquraıly qaramaýǵa shaqyrý.
Fotograf Anton Sýksdorff túsirgen sýrette Halonen basqyshta otyr.
«Onyń kózinen sharasyzdyqty kórýge bolady, al kıimi - eski ári las.
Men mundaı bolatyndyǵyn kútpegen edim. Ol osy jaǵdaıǵa oraı óz rólin tamasha oryndady. Biz tıisti kadrlardy 20 mınýttyń ishinde túsirip shyqtyq»,-deıdi fotograf.
Qaıyrymdylyq sharasyna Rovio oıyn kompanııasynyń arqasynda (Angry Birds qurýshy) tanymal bolǵan kásipker Peter Vesterbak ta qatysýda.
Aıta ketken jón, Halonen 2000 -2012 jyldar aralyǵynda Fınlıandııa Prezıdenti boldy. Prezıdenttik laýazymynan keıin ol áleýmettik jobalarǵa belsendi qatysa bastady.
Mysaly, 2015 jyly Taıaý Shyǵystan bosqyndardy ákelgen kezde Helsınkı vokzalyna kelip, jergilikti Qyzyl Krest bólimshesi úshin qarajat jınaǵan.
