Fınlıandııadaǵy Aalto sáýlet kesheni ıÝNESKO-nyń Búkilálemdik muralar tizimine endi
ASTANA. KAZINFORM – ıÝNESKO-nyń Búkilálemdik mura komıteti Fınlıandııa aýmaǵyndaǵy 13 zamanaýı sáýlet nysanynan turatyn Aalto Works sáýlet keshenin Búkilálemdik muralar tizimine engizdi. Bul týraly Fınlıandııanyń Bilim jáne mádenıet mınıstrligi habarlady, dep jazdy Reuters agenttigi.
Sheshim ıÝNESKO-nyń Ońtústik Koreıanyń Pýsan qalasynda ótken Búkilálemdik mura komıtetiniń 48-sessııasynda qabyldandy. Aalto Works keshenine fın sáýletshileri Alvar Aalto, onyń jubaılary ári sáýletshiler Aıno Aalto men Elıssa Aalto jobalaǵan 13 sáýlet nysany engen.
Fınlıandııa Bilim jáne mádenıet mınıstrliginiń málimetinshe, bul keshen HH ǵasyrdaǵy fın modernıstik sáýlet óneriniń jarqyn úlgisi sanalady. Onda Aalto mektebine tán «gýmanıstik modernızm» qaǵıdattary kórinis tapqan. Bul baǵyt ǵımarattardy tabıǵatpen úılestirýge, adamnyń jaılylyǵy men ál-aýqatyn basty orynǵa qoıýǵa negizdelgen. Sondaı-aq sáýlet óneriniń Fınlıandııadaǵy áleýmettik memleket qalyptasýyndaǵy rólin aıqyndaıdy.
Tizimge Helsınkıdegi Finlandia Hall, Alvar Aaltonyń úıi men sheberhanasy, Paimio sanatorııi, ıÝvıaskıýlıa ýnıversıtetiniń Aalto kampýsy, Seınıaıokı ákimshilik jáne mádenı ortalyǵy, Kotkadaǵy Sunila turǵyn aýdany, Villa Mairea, Imatradaǵy Úsh Krest shirkeýi jáne basqa da sáýlet nysandary endi.
Ǵylym jáne mádenıet mınıstri Marı-Leena Talvıtıdiń aıtýynsha, bul sheshim fın sáýlet óneriniń halyqaralyq deńgeıde moıyndalǵanyn kórsetedi.
Alvar Aalto HH ǵasyrdaǵy eń yqpaldy sáýletshilerdiń biri sanalady. Onyń jobalary fýnktsıonaldylyqty tabıǵı orta jáne adamnyń psıhologııalyq jaılylyǵymen ushtastyrýymen erekshelenedi. Sonyń jarqyn mysaldarynyń biri – 1933 jyly salynǵan Paimio týberkýlezge qarsy sanatorııi. Onda jaryqtandyrýdan bastap ınterer men jıhazǵa deıingi árbir element naýqastardyń tezirek saýyǵýyna yqpal etý maqsatynda jobalanǵan.
Aalto Works kesheniniń Búkilálemdik muralar tizimine engizilýimen Fınlıandııadaǵy ıÝNESKO-nyń Búkilálemdik mura nysandarynyń sany segizge jetti. Onyń jeteýi – mádenı, bireýi – tabıǵı mura sanatyna jatady.
Aıta keteıik, buǵan deıin Tashkent modernızminiń 10 sáýlet nysany ıÝNESKO-nyń Búkilálemdik muralar tizimine engenin jazdyq.
Sondaı-aq Olımp taýy, Normandııa jaǵajaılary da ıÝNESKO-nyń Dúnıejúzilik muralar tizimine engizildi.
