Fınlıandııada zańsyz jeke mektepter sany artyp keledi
ASTANA. KAZINFORM — Fınlıandııanyń qaýipsizdik qyzmeti (Supo) negizgi bilim berý lıtsenzııasy joq úı mektepteriniń sanynyń ósýin jáne ondaı mektepterde oqıtyn balalardyń sanyn tirkep otyr. Bul týraly AZERTADJ habarlady.
Vedomstvo málimeti boıynsha, keıbir mektepte ondaǵan oqýshylar bilim alady, bul alańdaýshylyq týǵyzady.
Supo pikirinshe, zańsyz jeke mektepter bilimdegi teńsizdik pen áleýmettik segregatsııaǵa, sondaı-aq balalardyń dinı nemese ıdeologııalyq radıkalızatsııasyna ákelýi múmkin. Mundaı bastamalardyń artynda kóbinese fýndamentalıstik, ýltrakonservatıvtik nemese ekstremıstik toptar turǵany aıtylady.
2018 jyldan keıin Fınlıandııada úıde oqıtyn balalar sany kúrt ósti jáne 2024 jyly shamamen 950 adamǵa jetti. Úıde oqýǵa kóshý úshin bılikten ruqsat alý qajet emes, ata-ananyń ótinishi jetkilikti, alaıda bul zańsyz mektepterdi qurýǵa jaǵdaı jasaıdy.
Úıde oqytý jaǵdaılarynyń jıileýi Aland araldarynda aıqyn baıqalady, munda shved otbastary belsendi qonys aýdaryp jatqan kórinedi. 2024 jylǵy kóktemde Alandtaǵy úıde bilim alatyn oqýshylarynyń 95%-y Shvetsııadan kóship kelgender bolǵan. Qatań shved shekteýlerin aınalyp ótý múmkindigi ýltraońshyl toptardy da tartyp otyr. Jańa kelgender arasynda ekstremıstik qozǵalyspen baılanysy bar otbasy jáne neonatsıstik Nordisk styrka uıymynyń jetekshisi bar.
Supo jaǵdaıdy qaýipti dep baǵalap, jeke jáne úı formatyndaǵy oqytýdy baqylaý sharalaryn qatańdatý qajettigin atap ótti.
Budan buryn Fınlıandııada alǵashqy júrgizýshisiz avtobýs iske qosylǵanyn jazǵanbyz.