Fınlıandııada turatyn qandastarymyz ulttyq-mádenı birlestik qurý nıetinde
ASTANA. 21 qazan. QazAqparat - Helsınkı qalasyndaǵy Qazaqstan Elshiliginde 19 qazanda Elshi Ǵalymjan Qoıshybaevtyń Fınlıandııadaǵy qazaq dıasporasy ókilderimen birinshi kezdesýi ótti.
Elshi Qazaqstan men Fınlıandııa arasyndaǵy saıası, saýda-ekonomıkalyq jáne mádenı yntymaqtastyǵynyń qarqyndy damýy men halyqtarymyzdyń arasyndaǵy dástúrli dostyq baılanystardyń nyǵaıyp otyrǵanyn atap ótti.
Qazaqstandyq dıplomat jerlesterge Qazaqstandaǵy ekonomıkalyq jáne saıası jaǵdaı týraly, sonymen qatar shet elderde júrgen Qazaqstan azamattaryna qatysty saıasatqa túsinik berip, olardyń ulttyq-mádenı, rýhanı jáne tildik qajettilikterin qanaǵattandyrý úshin qazaq dıasporasymen birlesken sharalar ótkizý jóninde naqty usynystar jasady.
Óz kezeginde dıaspora ókilderi Fınlıandııada qazaqstandyq dıplomatııalyq ókildiginiń ashylýyn qoldap, elden tys turatyn otandastarǵa kóńil aýdarylǵany úshin rızashylyqtaryn bildirdi.
Kezdesý barysynda dıaspora ókilderi mádenı-gýmanıtarlyq baılanystary damytý jóninde usynys jasady. Onyń ishinde jastar men balalarǵa ana tilin úıretý, qazaqtyń salt-dástúri men mádenıetimen tanystyrý maqsatynda Fınlıandııada qazaq ulttyq-mádenı birlestikti qurýdy usyndy.
Qazirgi ýaqytta beıresmı málimet boıynsha, Fınlıandııada 300 etnıkalyq qazaq turady, dep habarlady Fınlıandııadaǵy Qazaqstan Elshiliginen.
