Fınlıandııada benzın baǵasy rekordtyq deńgeıge deıin tómendedi

ASTANA. KAZINFORM — Fınlıandııada benzın baǵasy sońǵy tórt jyldaǵy eń tómengi deńgeıge tústi, dep habarlaıdy AZERTADJ.

El astanasy aımaǵynda 95E markaly benzınniń lıtri 1,60 eýrodan tómen baǵada satylyp jatyr.

Agenttiktiń habarlaýynsha, baǵanyń kúrt tómendeýi maýsymdyq aýytqýlarmen ǵana emes, sonymen qatar jahandyq ekonomıkalyq jaǵdaımen, onyń ishinde munaıdyń álemdik baǵasynyń tómendeýimen baılanysty.

Fınlıandııa Saýda-ónerkásip palatasy sarapshylarynyń aıtýynsha, benzın dástúrli túrde aptanyń basynda — jeksenbi jáne dúısenbi kúnderi arzandaıdy. Bul kezde tutynýshylar baǵalardy salystyryp, eń tıimdi janarmaı beketterin tańdaıdy. Jumys kúnderi, ásirese seısenbiden beısenbige deıin, suranystyń artýyna baılanysty otyn baǵasy kóteriledi.

Kóktemniń basynan bastap munaı baǵasy turaqty tómendep keledi. Sońǵy kúnderi Brent markaly munaıdyń barreli 60 eýroǵa baǵalandy, bul aldyńǵy jyldardaǵy deńgeıden edáýir tómen. Sarapshylardyń pikirinshe, munyń bir sebebi — AQSh prezıdenti Donald Tramptyń saýda rıtorıkasynyń kúsheıýi, bul jahandyq naryqtarda belgisizdikti arttyryp, munaıǵa degen boljamdy suranysty tómendetti.

Syrtqy faktorlarmen qatar, Fınlıandııadaǵy benzın baǵasyna ishki naryqtyń qurylymy da áser etedi. Elde otyn jetkizýshilerdiń sany shekteýli, bul naryqty básekelesterdiń baǵa ózgeristerine sezimtal etedi. Bir janarmaı beketter jelisindegi baǵanyń azǵantaı aýytqýy kóbinese basqa jelilerde de dereý kórinis tabady.

Mamandardyń boljamynsha, qysqa merzimde munaı jetkizilimine qatysty eleýli táýekelder joq. Degenmen, eger jahandyq ekonomıka qalpyna kele bastasa jáne energııa resýrstaryna suranys artsa, bul baǵanyń ósýine ákelýi múmkin, biraq ótken jyldardaǵy shekten tys deńgeıge jetpeıdi.

Buǵan deıin habarlanǵandaı, Fınlıandııa segizinshi jyl qatarynan álemdegi eń baqytty el bolyp tanyldy.