Fınlıandııada azamattyq alǵysy keletinder 2027 jyldan bastap jańa emtıhan tapsyrady
ASTANA. KAZINFORM – 2027 jyldyń naýryzynan bastap Fınlıandııa azamattyǵyn alýǵa úmitkerler úshin eldegi qoǵamdyq qurylymnyń negizderin bilýge arnalǵan jańa emtıhan engiziledi, dep habarlaıdy BELTA.
Jańa talap kúshine engenge deıin azamattyq alýǵa ótinish bergender emtıhan tapsyrýdan bosatylady.
Yle málimetinshe, test barysynda úmitkerlerdiń fın qoǵamynyń qurylymy men negizgi qaǵıdattary týraly bilimi tekseriledi. Suraqtar eldiń zańnamasyn, adamnyń negizgi quqyqtaryn, teńdik qaǵıdattaryn, sondaı-aq Fınlıandııanyń tarıhy men mádenıetin qamtıdy.
– Emtıhan elektrondy formatta fın nemese shved tilinde ótedi. Ony eńbekke qabiletti jastaǵy, ıaǵnı 18 ben 65 jas aralyǵyndaǵy azamattyqqa úmitkerler tapsyrady, – delingen habarlamada.
Fın nemese shved tilinde lıtseı nemese joǵary oqý ornyn bitirgen azamattar jańa emtıhannan bosatylady.
Jańa testileý júıesin ázirleýge Fınlıandııa bıligi shamamen 800 myń eýro bólgen.
Buǵan deıin Fınlıandııa azamattyǵyn alý úshin fın nemese shved tilin bilý deńgeıin rastaıtyn test tapsyryp, elde keminde bes jyl turý qajet bolatyn. 2024 jyldyń qazanynan bastap azamattyq alý úshin Fınlıandııada turýdyń qajetti merzimi bes jyldan segiz jylǵa deıin uzartyldy.
Aıta keteıik, Fınlıandııa azamattyq alý úshin synaq engizýdi josparlap otyrǵany habarlanǵan edi.
