Fınlıandııada alǵashqy júrgizýshisiz avtobýs iske qosyldy
ASTANA.KAZINFORM - Fınlıandııanyń Tampere qalasynda júrgizýshisiz elektr avtobýsy iske qosyldy, dep habarlaıdy Sınhýa.
Bul - Fınlıandııanyń turaqty qoǵamdyq kólik júıesine avtonomdy kóliktiń alǵash ret engizilýi.
Tampere qalasynyń bıligi baǵyttyń Hervantajıarvı jáne Lıntýhıttı aýdandary arasynda jumys isteıtinin, qalanyń tramvaı jelisine qosymsha baǵyt beretinin habarlady.
Tampereniń «Aqyldy qalany» damytý maqsattarynyń bóligi retinde bul baǵyt boıynsha 2022 jyly robotty avtobýs synaqtan ótkizilgen.
Aldyńǵy synaqtardan aıyrmashylyǵy, jolaýshylar endi qyzmetti paıdalaný úshin aqy tóleıdi. Bastapqyda avtobýsta júrgizýshi-kómekshi bolady, biraq kelesi kóktemde avtobýs qashyqtan basqarý ortalyǵy arqyly tolyq júrgizýshisiz rejımge kóshedi.
Qala sheneýnikteriniń aıtýynsha, robotty avtobýstan basqa, baǵyt boıynsha júrgizýshisi bar kádimgi mıkroavtobýs jumys isteıdi, ony qyzmet kórsetý úzilisteri kezinde nemese robotty avtobýs zarıadtalyp jatqanda aýystyrý retinde paıdalanýǵa bolady.
Buǵan deıin Nıderland óziniń alǵashqy júrgizýshisiz avtobýsyn synaqtan ótkizip jatqany habarlanǵan bolatyn.