Fınlıandııa joǵary bilim deńgeıi boıynsha qoıylǵan maqsattan qalyp keledi

ASTANA. KAZINFORM – 2030 jylǵa qaraı mejelengen 50 paıyzdyq kórsetkishke qaramastan, qazirgi tańda Fınlıandııada 25–34 jas aralyǵyndaǵy turǵyndardyń 40 paıyzdan azy ǵana joǵary oqý ornynyń dıplomyna ıe, dep habarlaıdy Azertadj.

Bul damyǵan elder boıynsha ortasha deńgeıden toǵyz paıyzdyq tarmaqqa tómen.

Lıtseı túlekteri jappaı joǵary oqý oryndaryna túsip jatqanymen, ósim negizinen kásibı kolledj túlekteri esebinen bolýy tıis, alaıda olardyń joǵary bilimge joly áli de kúrdeli bolyp otyr.

Oqýdy jalǵastyrýǵa qyzyǵýshylyq joǵary bolǵanyna qaramastan, kásibı kolledj túlekteriniń tek 20–30 paıyzy ǵana birneshe jyl ishinde joǵary oqý oryndaryna túsedi. Munyń basty sebepteriniń biri — aldyńǵy jyldary ýnıversıtetterge túse almaǵan eresek jastaǵy úmitkerler tarapynan oqý oryndaryndaǵy oryndar úshin joǵary báseke bolýy.

Etla zertteý ortalyǵy joǵary bilimdi mamandar sany jetkiliksiz bolǵan jaǵdaıda eksport pen jalpy ishki ónimniń edáýir tómendeýin boljaıdy.

Kompanııalardyń baǵalaýynsha, aldaǵy on jylda olarǵa 140 myń jańa qyzmetker qajet bolady, olardyń tórtten úshinde joǵary bilim bolýy tıis. Sonymen qatar Bilim mınıstrligi qazirgi stýdentterdi qabyldaý qarqyny saqtalǵan jaǵdaıda, Fınlıandııa ýaqyt óte kele maqsatty deńgeıge jete alatynyn, sondaı-aq aldaǵy jyldary joǵary oqý oryndary túlekteriniń sanynyń artýy halyqaralyq salystyrýlarda da kórinis tabatynyn atap ótti.

Degenmen bul úderis tym baıaý júrip jatyr jáne júıeli ózgeristerdi talap etedi.

Aıta ketelik elde keıingi bes jylda 16 JOO jabylǵany týraly jazǵan edik.