Fınlıandııa ıadrolyq qarýdy ákelýge jáne tranzıtteýge qoıylǵan tyıymdy alyp tastady
ASTANA. KAZINFORM – Fınlıandııa parlamenti el aýmaǵyna ıadrolyq qarýdy ákelýge, saqtaýǵa jáne tranzıtteýge qatysty kóp jyldyq shekteýlerdi alyp tastaıtyn zańnamalyq túzetýlerdi maquldady.
Zań jobasyn 125 depýtat qoldap daýys berse, 61 depýtat qarsy shyqty. Taǵy 13 depýtat daýys berýge qatyspady.
Qabyldanǵan ózgerister Fınlıandııanyń ıAdrolyq energııa týraly zańyna jáne Qylmystyq kodeksine engizildi. Bılik ókilderiniń málimetinshe, bul sheshim eldiń NATO qorǵanys júıesine tolyqqandy yqpaldasýyna múmkindik beredi.
Fınlıandııa Qorǵanys mınıstrligi jańa normalar daǵdarys jaǵdaılarynda ıkemdi áreket etýge jáne ulttyq zańnamany Norvegııa, Danııa jáne Shvetsııa sııaqty NATO-ǵa múshe skandınavııalyq elderdiń talaptaryna sáıkestendirýge baǵyttalǵanyn málimdedi.
Sonymen qatar Helsınkı el aýmaǵynda ıadrolyq qarýdy turaqty negizde ornalastyrýdy nemese jappaı qyryp-joıý qarýyn jasaýdy josparlamaıtynyn atap ótti. Ózgerister tek áskerı qaýip týyndaǵan jaǵdaıda NATO-nyń ıadrolyq tejeý kúshterin ýaqytsha ornalastyrýǵa nemese tranzıtpen ótkizýge quqyqtyq múmkindik beredi.
Fınlıandııa ıAdrolyq qarýdy taratpaý týraly shart boıynsha mindettemelerin saqtaıtynyn da rastady.
Fınlıandııa 2023 jyldyń sáýir aıynda NATO-nyń 31-múshesi atanyp, ondaǵan jyl boıy ustanǵan áskerı beıtaraptyq saıasatynan bas tartqan bolatyn.
Aıta keteıik, Fınlıandııada álemdegi alǵashqy ıadrolyq qaldyqtar qoımasy iske qosylmaq.
