Fınlıandııa úkimeti senimsizdik votýmynan aman qaldy

ASTANA. KAZINFORM — Fınlıandııa úkimeti oppozıtsııa tarapynan kóterilgen synǵa qaramastan, senimsizdik votýmynan aman qaldy. Oppozıtsııa eldegi kedeıliktiń ósýi men ómir súrý qunynyń qymbattaýyna baılanysty úkimetti synǵa alǵan edi, dep habarlaıdy AZERTADJ.

Agenttiktiń habarlaýynsha, Ulttyq koalıtsııalyq partııa jetekshilik etetin ońshyl-ortalyq koalıtsııa parlamentte kópshiliktiń qoldaýyna ıe boldy: úkimetti qoldap 88 depýtat daýys berse, 63-i qarsy shyqqan, taǵy 48 depýtat otyrysqa qatyspaǵan.

Senimsizdik votýmyn Sotsıal-demokratııalyq partııa, Solshyl odaq jáne Jasyl lıga bastaǵan oppozıtsııalyq kúshter usynǵan. Olar áleýmettik-ekonomıkalyq jaǵdaıdyń nasharlaýyna baılanysty úkimetten túsinikteme talap etken. Oppozıtsııanyń pikirinshe, eldegi shamamen bir mıllıon adam kedeılik pen áleýmettik oqshaýlaný qaýpinde tur.

Oppozıtsııa úkimetti áleýmettik shyǵyndardy qysqartty jáne ekonomıkalyq ósimdi yntalandyra almady dep aıyptady. Sondaı-aq jumyssyzdyq, baspanasyzdyq jáne tegin tamaq kezekteriniń artýy atap ótildi.

Áleýmettik qamsyzdandyrý mınıstri Sannı Gran-Laasonen úkimet saıasatyn qorǵap, áleýmettik qoldaý baǵytyndaǵy sharalarǵa toqtaldy.

Qatań synǵa qaramastan, daýys berý qorytyndysy boıynsha úkimet parlamenttiń senimin saqtap qaldy.

Osydan buryn Fınlıandııa azamattyq alý úshin synaq engizýdi josparlap otyrǵanyn jazǵan bolatynbyz.