Fınlıandııa men Shvetsııa Qazaqstannyń aýyl sharýashylyǵy salasyna ınvestıtsııa salýǵa nıetti
ASTANA. QazAqparat - Fınlıandııa men Shvetsııa Qazaqstannyń aýyl sharýashylyǵy salasyna ınvestıtsııa salýǵa nıetti. Bul týraly búgin QR AShM Investıtsııalyq saıasat jáne qarjy quraldary departamentiniń basqarma basshysy Rahat Nurǵalıev málim etti.
Onyń aıtýynsha, Aýyl sharýashylyǵy mınıstrligi sheteldik jáne otandyq ınvestıtsııalardy tartý úshin birqatar jumystar atqarýda. Eń birinshiden sheteldik ınvestorlarǵa jaǵdaı jasalýda. Atap aıtqanda, olarǵa memleket tarabynan qoldaý kórsetilip, salyqtyq jeńildikter, ınvestıtsııalyq sýbsıdııalar usynylýda. Munan bólek, «QazAgro» arqyly lızıng-kredıt berý de jolǵa qoıylǵan.
«Elimizdiń Syrtqy ister, Investıtsııalar jáne damý mınıstrlikterimen birlesip, transulttyq korporatsııalardy aýyl sharýashylyǵyna tartý jumystary júrgizilýde. Munan bólek, sheteldegi Qazaqstan elshilikteri janynda ınvestıtsııalyq keńesshiler bar. Solar arqyly biz suranys jiberip, ózimizdiń aýyl sharýashylyǵy salamyz boıynsha aqparat usynamyz, monıtorıng jasalady. Jalpy, bul saladaǵy bizdiń basy áriptesterimiz Reseı, Iran, Qytaı, Ýkraına, Eýropa elderinen Chehııa men Frantsııa bolyp otyr. Qazir Fınlıandııa men Shvetsııa elderi qyzyǵýshylyq tanytýda», - R.Nurǵalıev.
Onyń sózine qaraǵanda, Iran, Reseı jáne Qytaı elderi Qazaqstanyń aýyl sharýashylyǵy salasyndaǵy iri ınvestorlar sanalady. Munan bólek, Ýkraına, Chehııa jáne Frantsııa elderimen de aýyl sharýashylyǵy salasynda birlesken jobalardy júzege asyrý kózdelgen.
«Sońǵy 5 jylda agroónerkásip keshenine 102 mlrd. teńgeden astam, onyń ishinde ótken jyly 71 mlrd. teńge tikeleı shetel ınvestıtsııasy tartyldy. Aldaǵy 5 jylǵa da josparymyz bar. Óıtkeni, ónim óndirý úshin ózimizdiń qarjy jetkilisiz. Sondyqtan biz syrttan da qarjy tartamyz. Máselen, 1 aptadan keıin Shvetsııadan ınvestorlar keledi. Olar Soltústik Qazaqstan oblysynda josparlanyp otyrǵan ınvestıtsııalyq forýǵa qatysady. Al jalpy, aldaǵy 5 jylda qansha ınvestıtsııa tartylatyndyǵy naqty derektermen aıta almaımyz. Biraz, 102 mlrd. teńgeden kem bolmaıdy», - dedi R.Nurǵalıev.
