Fınlıandııa mektebindegi atys: bir bala qaza tapty, eki jasóspirim jaraqat aldy

HELЬSINKI. KAZINFORM – Seısenbi kúni Fınlıandııa astanasy mańyndaǵy mektepte atys bolyp, bir bala qaza tapqan, ekeýi aýyr jaraqat alǵan, polıtsııanyń málimdeýinshe, shabýyl jasady degen kúdikpen sol balalardyń 12 jastaǵy synyptasy qamaýǵa alynǵan, dep habarlaıdy Reuters.

Mektep ǵımaratyn polıtsııa qorshaýǵa aldy. Tutqyndaý beıbit jaǵdaıda, mektepten alys Sıltamakı mańynda oryn alǵan. Jergilikti polıtsııa janynda qarýy bar kúdikti qamaýda ekenin aıtqan.

Polıtsııanyń málimetinshe, qazirgi ýaqytta basqa kúdiktiler joq. Olar kúdiktiniń nemese qurban bolǵandardyń kim ekeni týraly tolyq málimet bermedi. Kúdikti aldyn ala tergeý kezinde shabýyl jasaǵanyn moıyndaǵan. Ol áleýmettik qyzmetke jiberiledi, sebebi qamaýǵa alýǵa áli óte jas.

Polıtsııa oqıǵa sebebi belgisiz ekenin aıtqan. Olar qarý kúdiktiniń týysyna tıesili ekenin anyqtaǵan. Onyń jeke quralǵa tıisti ruqsaty bolǵan.

Mýnıtsıpalıtettiń málimetinshe, atys Helsınkı mańyndaǵy Vantaa qalasyndaǵy Vıertola mektebinde boldy, onda birinshi synyptan toǵyzynshy synypqa deıin 800-ge jýyq oqýshy oqıdy jáne 90 adam jumys isteıdi.

Bul Fınlıandııada oryn alǵan jalǵyz oqıǵa emes. 2007 jyly Pekka-Erık Aývınen Helsınkı mańyndaǵy Djokela orta mektebinde alty oqýshyny, mektep medbıkesin, dırektordy jáne ózin tapanshamen atyp óltirgen.

Bir jyldan keıin, 2008 jyly taǵy bir stýdent Mattı Saarı Fınlıandııanyń soltústik-batysynda ornalasqan Kaýhaıokı qalasyndaǵy kásiptik ýchılışede adamdarǵa qarata oq jaýdyrǵan. Ol ózine oq atqansha toǵyz stýdent pen bir er qyzmetkerdi óltirgen.

Ańshylyq pen nysanaǵa atý boıynsha tanymal 5,6 mıllıon halqy bar elde 1,5 mıllıonnan astam lıtsenzııalyq atys qarýy men 430 myńǵa jýyq lıtsenzııa ıegerleri bar.