Fınlıandııa quramasy 2022 jylǵy shaıbaly hokkeıden álem chempıony atandy
NUR-SULTAN. QazAqparat - Búgin shaıbaly hokkeı fınalynda Fınlıandııa jáne Kanada quramalary kezdesti. Quramalar tartysty oıyn ótkizdi, dep habarlaıdy QazAqparat tilshisi.
Soǵan qaramastan, birinshi kezeńde tablodaǵy esepke ózgeris engen joq.
Ekinshi kezeńde kanadalyq Dılan Kozens 24-mınýtta mergendik tanytty. Bul sátte fınlıandııalyq quramanyń bir hokkeıshisi aıdynnan qýylyp, kanadalyqtar san basymdyǵyna ıe bolǵan edi.
Úshinshi kezeńde fınlıandııalyq hokkeıshiler alǵa qaraı umtyldy. Nátıjesinde 44-mınýtta Mıkael Granlýnd tarazy basyn teńestirse, ol 45-mınýtta óz quramasyn alǵa shyǵardy. Al, fınlıandııalyq Ioel Armıa 54-mınýtta basymdyqty arttyrty.
Kanadalyq Zak Ýaıtklaýd 57-mınýtta esep aıyrmasyn qysqartsa, 58-mınýtta Maks Komtýa tarazy basyn teńestirdi.
Negizgi kezeń 3:3 esebimen teń aıaqtalyp, oıyn overtaımǵa ulasty.
Overtaımda fınlıandııalyq Sakarı Mannınen jeńis shaıbasyn soqty. Nátıjesinde, Fınlıandııa álem chempıony ataǵyna qol jetkizdi. Osylaısha, olar óziniń tarıhynda tórtinshi márte jeńimpaz tuǵyryna kóterildi.
Al, 3-oryn úshin saıysta Chehııa hokkeıshileri AQSh quramasyn 8:4 esebimen súrindirdi.
Aıta ketsek, álem chempıonaty 13-29 mamyr aralyǵynda Fınlıandııanyń Helsınkı jáne Tampere qalalarynda ótti.
Eske salsaq, bıyl Qazaqstan quramasy álem chempıonaty top-dıvızıonda A tobynda jetinshi oryn alyp, úzdikter qataryndaǵy deńgeıin saqtap qaldy.
Álem chempıonatynda Italııa men Ulybrıtanııa birinshi dıvızıonǵa tústi. Olardyń ornyn 2023 jyly Vengrııa men Slovenııa quramalary basady.
Eske salsaq, budan buryn aldaǵy úsh jylda hokkeıden álem chempıonaty qaıda ótetini belgili boldy.
