Fınlıandııa Eýropada alǵash bolyp ýran shyǵarmaq

ASTANA. QazAqparat – 2026 jylǵa qaraı Fınlıandııada ýran óndirisi tolyq qýattylyqqa ótedi. El atom elektr stansalary úshin otyn retinde paıdalanatyn ýrandy shyǵara bastaıdy. Qazirgi ýaqytta ýrandy Eýroodaqtyń bir de bir eli óndirmeıdi, dep habarlaıdy QazAqparat euronews.com saıtyna silteme jasap.

Memlekettik Terrafame kompanııasy 2024 jyldyń jazyna qaraı Sotkamo aımaǵyndaǵy Talvıvaara kenishinde ýran óndirýdi bastaý josparyn jarııalady. Qazir onda elektr kólikteriniń batareıalaryn óndirýde qoldanylatyn nıkel men kobalt óndirilip jatyr. Kásiporynnyń málimetinshe, jerden kóterilgen kenniń bir kelisinde shamamen 17 mıllıgramm ýran bar jáne osy ýaqytqa deıin ony óndiristik qaldyqtarǵa jatqyzyp kelgen.

Terrafame jyl saıyn shamamen 200 tonna ýran alýy múmkin. Jobaǵa salynǵan ınvestıtsııa shamamen 20 mıllıon eýrony qurady. Óndirilgen ýran shetelge eksporttalady dep boljanýda.