Fınlıandııa Elshisi Qazaqstannyń tabystaryna joǵary baǵa berdi
ASTANA. QazAqparat - Búgin Májilis Tóraǵasy Nurlan Nyǵmatýlın Fınlıandııanyń Qazaqstandaǵy Tótenshe jáne Ókiletti Elshisi Mıkko Kıvıkoskıdi qabyldady, dep habarlaıdy QazAqparat.
Taraptar ekijaqty qarym-qatynasty, sonyń ishinde parlamentaralyq yntymaqtastyqty nyǵaıtýdyń ózekti máselelerin talqylady.
«Májilis Spıkeri elshini jańa qyzmetke taǵaıyndalýymen quttyqtap, endi birneshe kúnnen keıin Sýomıdiń 100 jyldyq mereıtoıy atalyp ótiletindigin alǵa tarta kele, fın halqyna gúldený men baq-bereke tiledi. Sonymen birge, osy jyly eki el arasynda dıplomatııalyq qarym-qatynastyń ornaǵanyna 25 jyl toldy. Spıker atap ótkendeı, Fınlıandııa Soltústik Eýropa elderiniń ishinde alǵashqylardyń biri bolyp, Qazaqstannyń táýelsizdigin moıyndady. Osy ýaqyttar ishinde qos memleket basshylarynyń salıqaly saıasatynyń arqasynda Qazaqstan men Fınlıandııa Ortalyq Azııa men Soltústik Eýropadaǵy strategııalyq áriptesterge aınaldy», - dep atap ótilgen Májilistiń baspasóz qyzmetiniń habarlamasynda.
Májilis Spıkeriniń pikirinshe, atalǵan memleket barlyq deńgeıde syndarly únqatysýǵa qol jetkizgen Qazaqstannyń syrtqy saıası jáne ekonomıkalyq áriptesi.
Óz kezeginde Elshi myrza Qazaqstannyń tabystaryna óte joǵary baǵa berip, bizdiń elimizdiń ekonomıkalyq saladaǵy tájirıbesi álemdegi birqatar elderge úlgi ekenin jetkizdi.
Taraptar Qazaqstanda ótken EKSPO halyqaralyq kórmesine aıryqsha nazar aýdaryp, bul eki eldiń baılanysyna jańa serpin beretindigine toqtaldy.
